三師會審

           9月22日係SGT Board 嘅第一日

           時間係食午飯之前， 中午1200 點

           地點 : 灣仔警察總部堅偉樓

           呢日係我見board嘅日子(第一次)，心情平靜，有少少緊張。我無預期呢次面試會咁快到， 由收到通知到見board只有8日。

           感覺有d似1998年去考警察果日， 我無為見board做特別嘅準備，只係心口有個勇字， 我係全心去考警察，立志要當差！ 見board當日都一樣，我無成日去約埋同事去study ， 只係自己一個去睇例，溫書。 雖然個個都話我閉關自封，話我一定唔得，但係我要照顧爽爽同屋企，加上我本身個性好難去將自己改變，去為個board去扭曲自己。

            因此，我無將自己修飾，只係帶住平日嘅我去面試。 當時我諗，我又唔係等住餅柴開飯， 只要我係一個好警察就得喇，如果三位長官見到真嘅我之後，認為我有能力升級帶領同事，我當然有信心承擔，但如果長官因為我無見board嘅技巧(而唔係無能力)而唔比我升級，亦都無所謂。  我唔會迫自己，更加唔會強求！

            最後我用左一個鐘頭(約57分鐘)去完成呢次面試，而呢個面試比我嘅感覺係好刺激，不過又好好玩！ 阿SIR (SP & CIP)雖然不停追問我，但無令我驚，反而令我好投入(因為一講做嘢我就好精神)。 整個面試嘅氣氛都好好，見完之後，阿SIR仲同我傾左一陣。雖然我唔知道我答得好唔好，但係我所答嘅都係真話。

            而家成個人都輕鬆晒，可以日日陪爽爽喇！ 哈哈.........

            多謝好多位曾經私人教導嘅長官同兄弟，雖然你哋成日叫我去study group我都唔去，但你哋都肯過D絕技比我，等我有個概念， 如果唔係我都唔知點算。 我更多謝咁多位一直喺我身邊鞭撻我嘅人，推廌我嘅人，支持我嘅人！ 多謝你哋！小女子真係無以為報。

             無論結果係點，我都好享受同珍惜今次嘅經驗，原來見board係咁嘅，又唔係想像中咁恐怖，都ok吖！

             今次面試去到十月尾，仲有好多兄弟要見，喺呢度我衷心祝你哋馬到功成，步步高陞！