感激警察

            我好感激有呢份工作，我一生有差唔多一半嘅收入 (唔係講緊$$$呀！)都來自呢份工作。

            因為做警察，我認識左自己，見識到社會好多人唔知唔見唔理嘅事，令我人生充滿色彩， 生命變得更有方向。  因為咁我可以用我一個人嘅力量發揮到最大， 去幫好多人。

             因為做警察，我認識左我前夫，佢陪我生活左八年， 雖然我唔可以同佢白頭到老，但係我呢段婚姻帶比我一個瑰寶----我個女「爽爽」！ 呢個女改變左我待人處事，改變左我人生觀，亦改變左我嘅餘生。  好多謝我前夫留低爽爽比我，等我人生可以有一個依靠。

            因為做警察，我認識左我呢班好上級、好同事， 佢哋都變成我嘅知已好友，全靠佢地一直喺我身邊支持我、教導我，最緊要係唔嫌棄我嘅臭脾氣，我先可以渡過每一個難關。 多謝你哋！ 可以同你哋共事， 有你哋陪我出生入死，即使有再多嘅困難險境，我都唔怕！

            因為做警察，我亦認識到好多衰人，遇過好多唔如意嘅事。 不過我並唔覺得討厭，正因為有呢種人、呢種事，令我比別人有更多機會去磨練我嘅心志，比別人學得更多！

            因為做警察，我認識到家人的重要，好多次衝鋒陷陣，令我知道家人係我一生最重要嘅。 我只係一個英文都唔識多個嘅人，喺d垃圾中學讀到中五嘅平凡人， 點可以令我最愛嘅媽媽因為我而感到光榮呢？  因為呢份工，令媽媽知道佢個女係一個有用嘅人，佢亦因為我的工作而感到光榮同安慰。

  多謝你--------香港警察！ 等我可以用心去為香港做一d事， 令我生活得有價值，希望有一日會有人記得香港曾經有過 我呢個警察！