為自己做事

              悠長假期中的爽爽，百無了賴，游手好閒，四出破壞，一無事處................

              原因都係因為佢有一個唔盡責嘅媽子，就係我！ 21號去田心，19號晚仲返緊夜，每日起身之後無耐又要返工，佢條衰妹仲唔係趁機偷懶咩。

              噚晚終於返埋最後一晚夜，今日一放工就睇下爽爽啲功課，原來有好多本未做，所以我就揀左三本比佢做。 佢一起身就見到成枱功課，差d想扮路過去廁所，不過無用，佢知今日一定走唔甩。

              我以為又要同佢抗爭幾個鐘頭，點知佢好快做完，其中一本係中文，學寫佢自己個名嘅最後一個字「童」。 佢出奇地好快做完，於是我就去瞓...........。

               大約中午一點幾，我聽到我媽咪不停鬧爽爽無用，寫黎寫去都寫唔好，我忍唔住去睇下，都唔係好差，起碼筆劃無錯。 我再提點一下臭豬之後，我又去瞓........。

               過左一陣，我聽到媽咪用好重嘅語氣去鬧爽爽，我聽到都覺得太過火，無理由用呢語氣去鬧一個剛剛五歲嘅小朋友，之後仲打佢，聽住爽爽不停叫喊，我忍唔住起身，但係我無出去制止，因為爽爽每日都要跟住婆婆，如果我去爭爽爽，激嬲左媽咪，情況仲難處理，臭豬對唔住喇！

                當媽咪打完之後就呯門入房，我立即出廳睇下個女，佢滿面淚痕，好可憐嘅樣。 我抱起佢，幫佢抺乾眼淚問佢：「有無嬲婆婆？」我知我唔應該咁問，呢個問題好似係問我自己。 爽爽搖一搖頭，坐返落櫈仔度，又開始攞起支筆寫個「童」字。 白紙上面有好多個唔係好靚童字。心裡面覺得爽爽乖左，佢無向我散嬌，仲好自覺咁繼續練字。

               其實佢由上午九點幾開始寫，寫到成兩點鐘，佢已經好叻好乖。 我捉住佢隻右手錫左一啖︰「你隻手手好叻，寫左好多個字！」佢隻手仔好細，其實佢好細個咋。 之後佢舉起隻左手對我講︰「佢都有份幫我手噤住本簿簿架！」 我再錫埋佢隻左手。

               我問爽爽︰「你知唔知點解你要寫自己個名，佢苦住面答我︰「因為係功課囉！」 我搖一搖頭，佢繼續估︰「因為要氹返婆婆開心囉！佢教左我好多次，不過我都寫得唔好。」我都係搖頭，爽爽不耐煩咁講︰「我唔知點解呀，係咪因為我寫黎寫去都寫得唔好，所以要不停咁寫呀？」

                我摸住佢個頭︰「因為"梁詠童"呢三個字係你爸爸送比你嘅第一份禮物，一份屬於爽爽嘅禮物，呢三個字係你嘅，你要去學寫呢三個字唔係為其他人，而係為你自己，你明白嘛？」 佢諗左一陣，抬高頭笑住咁講︰「我好鐘意呢份禮物，我識寫自己個名！」

                佢又再攞起支筆，不停咁寫。 當佢知道佢而家所做嘅事唔係為左其他人，而係自己，佢寫得比之前有心機。

                人都係咁，成日覺得自己去為人做好多嘢，當中不時會抱怨為人做嘅事好辛苦，唔甘心，有時做完都唔知自己為乜。 其實做人好簡單，人天生就係好自私，不過長大之後學識扮偉大，將自己做嘅事都歸咎於人，原來所做嘅都係為自己， 得著都係自己，當知道所做嘅事係為自己而做之後，心入面自然會做得好樂意。