有口難言

            喺爽爽出世之前， 我有一個女(狗女)，佢叫囡囡， 係一隻史納莎。  如果..........囡囡仲在生， 佢應該有12歲。 當爽爽出世之後， 為左爽爽健康(敏感症)， 我放棄左囡囡， 比左$6,000將佢交左比「保護遺棄動物協會」收養。  好快........囡囡就有一個住喺淺水灣嘅人收養左佢， 我希望囡囡會忘記我呢個不知所謂嘅主人， 從此生活得幸福、快樂。

             生、老、病、死-----------不論係對人、對寵物， 都一樣難受！  記得我同囡囡一齊生活呢段時間， 最令我心痛嘅事， 除左係同佢要分開之外， 就係當囡囡病嘅時候， 我辦法去幫佢。

            有好幾次見佢好似有唔舒服， 問佢佢又講唔到，只係一直要我抱住佢， 見到傻豬個樣，心有一種好難形容嘅痛。  獸醫真係好叻， 即使病人講唔到， 佢一樣可以診斷出病因。

             其中一次係，囡囡生完bb，之後因為餵哺過量， 消耗太多鈣， 令佢失禁、 抽筋、嘔.........。 醫生話佢可能會死， 只可以靠囡囡自己意志。  當晚我決定帶爽爽返屋企， 雖然囡囡要一直吊藥，但我知如果囡囡真係過唔到， 佢會想臨終前見到自己嘅仔女。

            呢種感覺， 自從囡囡離開我之後， 偶爾我都會感受到。

             因為除左狗仔之外， BB都一樣， 當有事嘅時候， 佢都係講唔到。   爽爽都試過入院，我仲可以清楚記得兩母女一齊捱嘅每一晚。兩次入院， 我老公都無黎幫手， 只係探一探爽爽就走。 有一次，佢直情一日都唔黎睇我兩母女。

              所以我特別記得喺醫院嘅每一個夜晚， 望住個臭豬插晒喉，連呼吸都好似好辛苦嘅樣， 我只可以一直握佢好熱， 好細嘅手仔， 一路陪住佢。 

              我諗有好多父母都感受到我有幾心痛， 亦會好了解「BB有口難言」對大人黎講真係一種懲罰。

              噚晚， 爽爽發高燒， 問佢邊度唔舒服， 佢只係識喊住話好辛苦，不過爽爽都講到少少比我知， 相信唔係好嚴重(因為小朋友都係會偶爾發下燒)，  之後我比D退燒藥佢食， 再觀察住佢， 因為如果係唔識退燒， 就要即刻去睇醫生。

              今日， 臭豬真係好好多喇， 佢同我都好似， 因為病緊都係好精神咁。  過左半日，見佢都無燒又無事， 經過家庭會議(我同媽咪) ， 我地無帶佢去睇醫生。

              爽爽而家瞓左喇， 無事， 不過我一樣要教鬧鐘， 只係唔洗好似噚晚咁，一個鐘起一次身，而係每兩個鐘起一次身， 我太爛瞓喇，所以要教鬧鐘囉。

              以前就係媽咪去照顧我， 但係我就唔明媽咪點解一日到黑唔係話驚我凍親， 就係驚我無營養。 而家我深切明白「養兒一百歲，長憂九十九」。

              呢種滋味， 真係.......有口難言！