選擇

           金金，呢個故事係特別講你知嘅！

           我阿哥(契大佬)， 係一個好嚴肅嘅人， 佢好少講嘢， 好少人了解佢。 佢返工還好，會講吓嘢， 但係佢一返到屋企，佢可以講唔到十句說話就入房瞓。   我阿嫂剛剛相反，佢好樂天，好健談，天跌落黎佢都賴理嘅人。  但係每一個人都有情緒唔好嘅時候， 我阿哥因為工作，令佢成個人都陷入低潮， 當時佢連開工都唔講嘢，情況維持左有2兩個月。 

         我做妹妹嘅都頂佢唔順，而家咩事呀？ 洗唔洗咁呀？ 我打比嫂嫂問佢情況， 順便安慰嫂嫂。 點知， 嫂嫂好好笑咁講， 佢天生係咁架，有乜佢都係鍾意自已諗， 由得佢囉， 我唔信佢一世扮啞。 如果係嘅， 我咪帶埋個女去學手語囉！

         我問嫂嫂，阿哥有無講d乜嘢， 其實我好心痛我阿哥， 我寧願佢喊，佢鬧，起碼我知佢有乜嘢唔開心， 但係佢只係一直將自己鎖喺間房。  有一次我嬲到走去佢屋企， 諗住鬧鬼佢。  後來上到佢屋企，阿嫂心情仍然好靚， 屋企入面嘅氣氛依好好， 無比阿哥破壞。

          到開飯， 個傻佬終於都出房，食飯過程中， 阿嫂繼續同阿哥講嘢， 阿哥就衰到用個木口木面嘅衰樣，哼兩聲就算！  食完飯， 阿哥入返房。  

          嫂嫂同我講， 其實佢自己都有唔開心嘅事想同阿哥講， 可惜阿哥唔會想聽。 有時都幾辛苦， 對住個EQ咁低嘅人， 但係做夫妻就係咁，要多D去用對方嘅優點去安慰自己受傷嘅心靈。 之後嫂嫂講左好多阿哥平時嘅優點出黎。 

        表面上佢哋唔夾， 好難溝通， 但係佢地除左有愛之外，仲有用包容、忍耐、欣賞去維持呢段婚姻。 

(2)    我認識一對夫妻， 佢哋性格好相近，生活上好多嘢都好似好夾，但係我好耐見到佢哋笑。   

        後來有一次， 我見佢太太坐喺公園喊， 我就上前去問，知道原來佢同老公鬧交。  聽左好耐， 原來佢哋好難溝通， 講一句說話都好難明。   之後我又同個男嘅傾吓， 佢同太太嘅感覺都一樣，覺得好難溝通。

         無耐佢哋離婚喇， 你知唔知點解？ 唔係真係因為溝通唔到，而係唔夠愛， 亦唔懂得愛。  我只見佢哋不斷計算自己嘅收獲，甚至係將自己放大到摭住對方嘅所有，佢地無包容，彼此眼中只有自己。 呢份愛點會長久？ 

             其實世上無可以保證嘅婚姻， 但係人唔能夠因為咁而對未來失去信心。   我同樣面對婚姻失敗， 但係唔等於我將來無幸福！  反而我哋呢班曾經失敗過嘅人， 應該會活得更好， 因為我哋有別人無嘅傷痛， 呢D痛令我哋明白 "失敗乃成功之母"。

              所以曾經婚姻失敗過嘅朋友， 我哋要比D心機去珍惜， 去享受愛！   唔好比經歷阻礙向前嘅路， 要樂觀，要正面，要積極！ 幸福喺前面等緊你同我！