洗白白 ~ 化妝掃篇

今日見有點空閒時間就整理下啲工具，順便來個大洗

而家好多女仔都擁有一套/多技化妝掃，作為化妝師既我當然都有啦

但化妝掃如何清洗就大家都未必知或半桶水咁????

化妝掃係直接接觸面部皮膚既工具，所以必須保持清潔

佢既係揾食工具之一，如果連自己既工具都唔識保養，咁點得呀???

如果你見到個化妝師啲掃未用係你塊面上已見有好多顏色既話，咁即係話 :

1. 唔知佢幾耐冇洗過套工具??
2. 計唔到技掃用過係幾多人既面上??
3. 好大機會會引起皮膚敏感，甚至發炎 !!
4. 化妝掃本身已混有一種/多種顏色，試問又點可以將眼影顏色帶出?

眼見好多行家都未必會定期清洗化妝工具，有時仲會用『掩眼法』.......

我自己就過唔到尼個關口啦，收左人家$要對得住人嘛!!

(以上純為個人觀察/感想，絶冇任何含意或影射成份)

清洗化妝掃分「濕洗」同「乾洗」

「濕洗」亦都有分"平"同"貴"既方法，今日就教大家"平"既濕洗方法

只要簡單十步曲，包你套化妝掃乾乾淨淨

工具 : 用過既化妝掃、清水、勞工皂、 護髮素少量、廚房紙

一步 : 開一盆清水浸住勞工皂

二步 : 勞工皂浸軟左少少時，拿化妝掃係皂面打轉，啲顏色自自然然會走出來

三步 : 捽出左啲顏色后，搾乾水待處理 (我啲掃定期大洗，都成盆水黑黑咁....)

四步 : 開盆清水，將化妝掃逐一過水

五步 : 過水后，逐一搾乾水 (不用太乾)

六步 : 再開另一盆清水，加入少量護髮素 (要攪暈哦~ )

七步 : 將化妝掃浸落護髮素水，靜置一陣后過水 (同洗頭一樣，但不要捽)*

八步 : 完全過水后，放係廚房紙上

九步 : 按壓廚房紙，將化妝掃上既水壓出

十步 : 按壓完后，將所有化妝掃平放在新既廚房紙上自然風乾