德奧之旅 ﹣Day 1

因為貪平，班機時間麻麻地，中午機，去到德國已經係夜晚，冇咗一日。

第一次坐德國漢莎，十多小時行程裡可用一波三折來形容。

首先去到機場，先知自己機票上的名寫錯咗，要補＄＄改名．．．激屎，所有人機票都係我買，都冇寫錯，惟獨自己寫錯自己個名．．．補錢都算，改名好易之麻，點解要罰我企成一粒鐘先攪得點！

距離起飛時間得返一個鐘唔夠，班機好滿，唔夠經濟機位，結果細佬upgrade咗去商務客位，點解唔係我嘅？

跟住食第一餐時，遇到氣流，架機不停咁高底上下咁震，仲要震咗成粒鐘，雖然我試過更加勁的氣流，不過今次好耐，所有空中服務都要暫停 ！空姐仲話我地係喜瑪拉阿山上空遇到風塵暴！剩係聽個名都得人驚！

風塵暴過後，一切回復平靜，不過啲空姐唔知係咪未驚完，首先係倒咗杯冰落我阿媽個頭，之後又倒咗杯水落我老豆到．．． 所以有錢都係坐國泰，唔係因為服務好啲，而係至少有私人電視啦，話哂長途機，居然係睇走廊電視！！

到法蘭克福，已經係晚上，今晚入住係火車站附近的Hotel Excelsior。起初阿媽以為同香港的怡東酒店一樣（咁天真嘅？），點知最後發覺只係同名，質數就差好遠囉．．．哈哈！不過我仍推介此酒店，因為真係超方便，價錢實惠，包早餐又包mini bar，床上仲有朱古力送㖭，我冇食，但至少feel到啲心意！

睡不著，和細佬行去廣場影夜景，凍到我變雪條！不過影出嚟啲相又幾靚喎！（注：啲相係我細佬影的，帶哂腳架咁影，懶ＰＲＯ咁）

Ｅ張係我影！嘩哈哈．．．冇腳架係咁上下㗎啦！

火車站內的玩具，入錢火車就會郁！