點菜

一伙兒出外用膳，我都會主動負責點菜，因為我知道大部份人都有選擇恐症或只點一道菜，叫作「是但」。我不點菜，誰來點菜呢？

「大家有咩想食呀？有咩唔食得呀？」我拿著菜單說。

「你話事得啦﹗」「我哋冇所謂﹗」「是但喇﹗」三五個女人高聲地說。

「好，咁先叫一個鹵水併盤﹗」

「Oh, sorry ! 我唔食鵝、唔食鴨架﹗」先頭一位女士答道。

「咁，不如叫一斤蝦，好似幾新鮮﹗」

「但我有皮膚敏感，我唔食得﹗不過你哋可以照叫，最多我唔食囉。」另一位女士大方地說。

「咁唔好，叫個第二樣啦﹗」我將我僅餘的風度釋放出來。

「家常便飯，叫一碟涼瓜牛肉，開始天氣熱啦﹗」

「唔好意思，我戒咗牛肉。唔緊要啦，你哋唔駛理我。」一位好像與佛有緣的女人温柔地說。

「咁炸鮮奶呢，依度最出名﹗」開始不耐煩的我續說。

「好熱氣喎，我唔想生粒粒。」一位皮膚不怎樣好的女士搶著說。

「#$%&#%」我心想。

「你哋話事啦，原來全張枱得我先至係冇所謂﹗」我說著將菜單大力放在桌上。

大家七嘴八舌擾攘二十分鐘之後，終於點完菜。但發覺菜單上都有大家不食的東西，我只好頂著「隆隆」作響的肚皮苦笑置之。

以上的情節，相信你都曾經有相似的經驗。有些女人對我說，點菜前應該諮詢民意，如果自己「話晒事」就是不夠民主、大男人和不理人感受的表現。香港人就是這個樣子，叫你上街爭取民主，要求普選，就諸多藉口，轉過頭食晚飯，就打著「民主」的旗號，罵我這個幫大家點菜的朋友係獨裁者。

我想如果香港有民主有普選，真的會餓死許多人。