陰毒廚房

陰毒廚房，食咗入廠

以下係今集五位嘉賓製作嘅菜式，有賴各卜友評判俾分，選出最佳菜餚：

第一號參賽者：肥黎（無賴廚房）

菜式：煲水

材料：汽水

調味：油、鹽、醋

貼士及特色：

1. 不要用普通水，一定要用汽水，要交足氣，煲時先有好氣體。

2. 煲時要開行風扇，扇風點火，火才會猛。

3. 不時要火上加油，燒到佢慶烚烚。

4. 加鹽加醋，水更加會煲得起。

5. 好多人以為煲完水就得，其實煲完後有一個好重要嘅步驟，就係搵人吹，越多人吹水越好。

第二號參賽者：曾SIR（離譜廚房）

菜式：炒葃（葃菇即慈菇也）

材料：葃菇、全梅

調味：生抽、老抽

貼示及特色

1. 一定要用一啲無爛嘅完全梅，無全梅係炒葃唔到。

2. 要用黑鑊炒，最好有咁大鑊得咁大鑊。

3. 一定要先爆料，先至入味。

4. 最好加生抽同老抽整色整水。

5. 最後上菜時，記得唔好用碗裝，因為太梗，好容易打爛自己或人哋飯碗。

第三位參賽者：陳希（賤精廚房）

菜式：屈鯉

材料：鯉、黃腳雞或青口

調味：魯水汁

1. 用Cool寒及沙塵之地出產之鯉最好，清清白白嘅就唔好屈勒。

2. 以前要用黃腳雞一齊屈，宜家有直邊青口(簡稱:直口)就屈得。

3. 鯉煮前一定要搵人㩒，越多人越㩒佢越好。

4. 要用魯屈。

5. 先谷一谷，然後一齊焗佢，咁就應該屈得成勒。

第四位參賽者：陳聰（卑鄙廚房）

菜式：煮重米

材料：米、豬頭肉

調味：辣椒油、豆粉

貼士及特色

1. 豬頭肉一定要用內肉，唔可以俾面佢。

2. 煮時加入大量豆粉，令到有咁杰得咁杰。

3. 加辣椒油，要有咁辣得咁辣。

4. 記得食完後，要食碗面反碗底。

5. 該餸可治食濕米及軟飯。

第五號參賽者：成蟲（可恥廚房）

菜式：炸蠅

材料：果蠅、麵條

調味：大量香料

貼士及特色

1. 唔好買新鮮嘅果蠅，最好買乾曬嘅，炸曬蠅。

2. 炸時要落大量香料，有料先可以炸蠅。

3. 唔可以炸咁耐，如果唔係一鑊熟。

4. 如果配麵，煮麵時，要睇麵色，勢色唔對就唔好繼續。

5. 炸蠅唔係人人接受，要有心理準備。

（以上菜式乃由專人訓練炮製，切勿模仿）