玩夠，劈炮唔撈

好耐未見過K，估唔到今日係街度撞到佢。佢係我身邊行過既時候，我有少少猶豫，眼前呢個人到底係唔係佢？

終於，我鼓起勇起拍佢膊頭，佢回頭，我發現真係佢，不過個樣變咗好多，變到好似……唔知點樣形容，好似隔離屋三叔公個仔，而唔似以前在PP見到既K。

「點呀你？」

「我唔出泥玩架啦……」

我見到佢查籠雀，趕住去街市買餸咁款，但係咁夷都講咗兩句。

「點解，唔出泥玩呀？」

「玩夠啦，收山啦。」

以前K係果一種，逢請必到，逢到必早，唔請都到，一玩由星期六玩到星期日，一至星期五日日都玩果一種人，由PP玩到去WORK，由LAB玩到去早場，由早場玩到去LUNCH場，由PARTY玩到去中灣、南灣，日日去做GYM，狂蒲桑拿，每分每秒都係男人既人。

「有乜好玩呀，而家，要玩以前都玩過晒啦，而家仲出來玩都己經水尾，糖又唔爆，人又唔靚，市道又唔好，要玩要搵錢，都係以前９０年代既事，如果而家仲要我出來捱世界，跑碼頭，咁就慘，而家出來做嘢，就算做老闆都係賺份人工，唔似以前是旦開間時裝店，半年都可以賺五十萬，而家係乜嘢世界呀，唔玩啦，退休好過啦。」

以前b呢巴啦既佢，而家變到好似一個街坊咁樣，但精神咗好多，無以前個樣咁殘，咁有煞氣，祥和咗好多。

「以前日日都不過係不見天日，去到邊度蒲都係黑媽媽，其實而家諗番都覺得好戇居，去一間黑房跳舞要三四百蚊，唔去啦，你唔駛叫我出去玩啦，我玩夠啦……」

傾唔夠兩句，就見到K頭都唔回走咗。

當我仲想問，Ｋ回頭講：「我唔想好似阿B咁既收場……保重啦。」

阿B，其實以前都係一個成日出來玩既人，不過前幾年因為去完早場，未散晒，兜頭就俾部的士撞到昏迷，瞓咗一個禮拜就走咗。

望住佢既背影，我都無再追上去，其實，適當時候走，都好過「磨爛席」，不過，到底乜嘢時候起至係「玩到夠」既時候？

夠啦，見好就收啦。