古老石山…黃竹角咀赤洲導賞團

見到好多人話出嘴摸鬼手…因為行程超過三十公里，而且出嘴的多數都係年輕人；唔知自已有無咁既能耐？作為一個肺癌癌症康覆者，要出嘴暫時想下都好啦。如果你問我有冇興趣？只要你唔係跑，又唔討厭我上山慢過人，我會去架！

未揾到有邊個儍佬會陪我由陸路去黃竹角咀前…有機會參加香港國家地質公園辦的黃竹角咀赤洲導賞團。

黃竹角咀有香港最古老，是泥盤紀的層積岩；和白堊紀對面的赤洲。由黃竹角海、紅石門，長咀至紅排都係含有鐵質的層積岩石，尤其赤洲全島一片丹紅，被旅行界稱作「海上丹霞」。

是日吐露港內風平浪靜，天陰可能有微雨。能見度唔係咁好啦。由Google Earth放大，前人表示的鬼手的位置有兩個，一個在東北岸(下圖圖左)，一個面向大洋的西北面近赤門海峽(下圖圖右)。都唔知邊個真？今次由海路去，可以自已鑑定一下

呢次導賞船純屬海上觀賞，首先經過吐露港赤門海峽的水警撿查站。能見度有幾清從呢處就知勒。

結果今次証明鬼手事實真係在西北面近赤門海峽處(上圖右邊係正確)。下圖GPS記錄上打小圈處向著赤洲的就係鬼手的正確位置。右邊係赤洲。最上打圈的是導賞船轉彎航向赤洲島。

根據香港旅遊局編印的資料，原來黃竹角咀形成於三億八千萬年前正藉泥盆紀，而赤洲形成於一億四千萬年前的白堊紀。中間經過二億幾年的升沉活動，香港其他部份先後形成。望真下個表，白堊紀之前係株羅紀…香港已經擁有國家地質公園，作為香港人唔惡補一下咁就真係太“豬玀”了。

原來真正的鬼手在此。好多人走埋一邊睇…成只船傾斜十度八度。如果風浪打正咪…。結果我座響另一邊，等到機會先影啦。鬼手最神似應該由岸上個牌向海影…留番有機會出咀先影餐飽…希望啦。我地班山友有冇興趣昂壯山或者大嶺上面露營呀？咁唔駛趕喉趕命跑馬看花，可以優閒一D一早落山揾鬼手…做個古老石山認認真真咁認識最古老既岩石？

除左鬼手，呢處可以響海上欣賞紅白色層理。層理都係差不多垂直的走向，可想大自然褶曲的力量…至於乜腩物腩留番埋岸的旅程先睇啦。

睇完黃竹角咀，有個初步認識。下一個地點就係赤洲。赤洲就位于黃竹角咀對開…呢個島大多由紅色的層積岩形成，層理好清晰。它的成份係砂粒，砂礫，汙泥和粉砂的沉積物經堆積，岩層的鐵質氧化變成紅色…板塊運動露出來所以見到係紅色。諗唔到導賞活動令到我地可以學到好多野…島上的景點大多數沿東南面，例如赤漠迷城，棧道，赤洲洞…留番參加海線隊先欣賞啦。總之依家有個印象先…下面呢張相相信係赤漠迷城的狗頭石挂！

今日出左赤門海峽，又吹東北風達到四五級，某個方向浪都好大。經過呢處，好多人響度磯釣，嘩嘩咁大浪釣魚？…佢地係唔係釣海豹呢？

講番轉頭出黃竹角咀摸鬼手，邊位大大可以指點由大嶺落石灘係唔係下面的路線呢？