四哥去咗法國......... 醫院

上星期, 四哥比 QE 掟咗過九龍醫院, 仲估係醫生認為佢已有好轉, 無須嚴密觀察, 可將床位讓給有更需要的人. 事實上唔可以太信任囉......

轉院前, 嗰個藏頭露尾嘅所謂醫生, 好輕描淡寫地係咁意講下病情, 話佢頭骨裂咗同埋有些少內出血, 頭入面仍有少量玻璃碎. 頭骨可以等佢自己癒合, 而內出血會個人自己本身吸收返.
家姐問佢咁啲玻璃碎點算呀?  佢話 : 大粒嗰啲已經攞咗出嚟啦, 傷口啱啱先縫咗針, 無謂再攪佢吖! 講得好輕鬆, 臨尾仲加多句 : 好小事啫, 無乜嘢嘅! 
家姐再問 : 有咩狀況出現, 咁點呀?  佢答得妙囉 : 到時先算啦 ~~~
(我聽後的感覺是 : 派錯藥呀, 到時先算啦 ~~  打錯針呀, 到時先算啦 ~~  醫死人呀, 到時先算啦 ~~)

喺九龍醫院嗰幾日, 完全無藥不特只, 原來連醫生巡房都無架! 由得四哥日瞓夜瞓, 乜醫療都無!! 
之前已同四嫂講過, 如果需要轉私家醫院, 有朋友可以幫到手. 所以佢一同我講, 馬上搵舊男友幫忙 Book 位 (而家私家醫院啲床位有幾緊張, 大家都知啦 ~~) 即日寫信收佢入院, 第二日即刻轉院  (5 月 6 日 -- 即係我揀樓嗰日   )  一入院即照腦掃瞄, 原來要先做掃瞄, 確定入面並無丁點金屬才可以做磁力共振.
掃瞄Report 當晚出咗嚟, 發覺唔係裂痕咁簡單, 而係裂開幾塊, 如果再裂前些少落到耳門蝸, 佢就做硬聾耳陳嘅契哥咯, 都未話唔驚 
而且仲有玻璃碎喺入面, 如果從裂縫跌咗入腦裡面會好危險, 首先要攞返出嚟. 今日會全身麻醉做手術, 希望長生天保祐佢呢個咁好嘅人!!