令人情緒低落的《狂派再起》

唔好問，呢套戲不合理的地方太多，炒雜碎，主線弱到爆，無聊的枝節也太多，劇情要駁大把野可以駁 (最難令人服係狂派機械人點變索女呀？你估而家睇緊 T3 咩)，唔好睇！50 分及格，我俾 60 分，果 10 分係俾製作。

IMAX 都一樣唔過癮，唔計戲院的聲效勁普通，後置我坐左盲點位 (間戲院應該有大量)，令左邊環繞聲細過右邊好多，我指套戲用 IMAX 拍的場面，少得可憐！話「幾場戲用 IMAX 拍」不如話係「幾個鏡頭用 IMAX 拍」算罷！只得柯柏文樹林打果場叫做比較多 IMAX…我知…其實呢套戲重點場口一定有機械人，而機械人全部都係幕後用電腦加上去，所以唔似《黑夜之神》的 IMAX 場口般咁靚，不過畫面密度勁左咁多，相信用 IMAX 鏡組拍的部份電腦特效更加難做。

只係既然用 IMAX 做宣傳，我唔理佢成本太高 (應該唔會係呢個原因卦…)，抑或導演嫌部 IMAX 攝影機太巨型唔方便，總之得咁少我就覺得唔收貨。有《黑夜之神》珠玉在前，我認為往後的戲情片用 IMAX 拍的話，所佔部份應該只有越來越多才似樣！

不過話轉頭，《黑夜之神》的非 IMAX 部份畫質好一般，而《變形金剛：狂派再起》的畫質整體上都好靚。

講返套戲…對於今次呢套爛左一半的續集，我真係想講，估唔到 Micahel Bay 真係唔識拍續集的，上次拍 Bad Boys 2 已經係咁…

唔該佢唔好拍第三集，要拍俾第二個拍。

而家，我腦海中只係不斷重覆返第一集的片段！

我雖然同自己講，唔好有太多期望…但係呢套戲始終係我近年最鍾意的科幻片，話唔期望，我就唔會晨早 book 定飛啦，如果唔係 6 月 24 日 D 飛唔俾網上訂，我一定第一日上就睇，而家遲左一日，再諗返竟然係好事，因為遲一日表示我期望多一日、失望少一日……昨晚一返到屋企就訓，到今朝早咁多個鐘頭之後，而家失望的感覺仍然存在。

期望越大、失望越大，我記得同樣的感覺，今次算係最強烈，就算睇《未來戰士3》都沒有那麼失望，因為知道轉左導演。

記得上次入場失望而回，係《侏羅紀公園：迷失世界》，另外《蜘蛛俠3》及《史力加3》都係一樣。因為講到明班底係原班人馬，點解會分別咁大？唉…我要快點入場睇第二套戲先得，沖淡佢…不過我相信下一個入場睇的戲應該會係《沖天救兵》