05.12.2008 四川 8級地震

就起香港佛誕假期，我同一班朋友高高興興入長洲參予太平清醮搶包山之同時，四川發生左黎克特制 8 級既特大地震。我直至13號零晨返到屋企，臨前聽到三點新聞報導先知呢件事。當時都好，幾小時後亦要返工，都冇去理會災情。

往後從各方報導知道災情既嚴重性。好多縣鎮都位於山谷內，陸路被切斷，增加救援既難度。諗起好多人民壓起廢礫，需要救援，以及好多人都痛失家人。亦有好多小朋友要保命就要當場截肢。心情既激動又沉重。諗緊有乜野我可以做得到。 

[中國改革開放以來，我所認識以往(文革以前)較有人情味，守望相助既一代人已經俾凡事只想富起來既取代。想富起來不是問題，只係有太多負面既新聞報導有權既點樣只顧自身利益，......。加上好多接觸到既，出到國外俾人感覺財大氣粗，甚至有辱國體，距離成為別國由心尊敬還有一段路要走。]

我想講既係我地唔會因以上既一D睇法而唔做D野。咁大形既災情，救援物資同災後重建都需要金錢。透過咁多國際組織，我相信災民可以得到幫助。

上天無視蒼生，惟願人間有情。

--------------------------------------------------------------------

連日來，透過記者既努力，一幕一幕動人故事，展現左災民既勇氣同尊嚴。我地好戥一D搵到親人高興，好似劉小樺小妹妹(溫總安慰下仍哭得令人心傷既)，佢終於跟佢家姐重遇，而且父母亦証實無恙。

但係亦有好多好似陳堅咁，最終未能跟家人重逢：http://tw.youtube.com/watch?v=T5ye2TJVcvU&feature=related

希望大家繼續支持受災既人民。

註：賑災D捐款我透過匯豐銀行捐左俾紅十字會，匯豐銀行會捐出相同金額俾紅十字會 (最多八百萬)。另外新聞報導話 2006/2007 年度紅十字會行政費只佔1.11%(係咁多團體中最低)，希望講出黎大家參考。