2009/11/29

昨天晚上去了海洋公園，是團體包場，平時人迫迫排哂大隊，但昨晚很清靜，甚麼都可以玩多幾次，仔仔比以前大膽，很多機動遊戲都肯去試，爸爸陪佢玩到自己都作嘔，我從來最怕就係速度遊戲，又畏高，上去摩天輪都大嗌，玩海盜船更加嗌到歇斯底里，真係好失禮 ...

同事託我影熊貓，趁住爸爸仲未駕車入黎匯合我地，我同仔仔第一站就走去睇熊貓，平時直情迫都迫唔到埋去玻璃度，今日終於可以埋到去影到相0刺 ...

公園夜景 ... 呢個大氣球可以升上天，但我唔敢坐亦唔想屋企人坐上去，因為硬係型住上到去斷咗纜，咁就返唔到地面，佢地本來係想坐，好在呢個係唯一要排長龍0既，所以佢地都放棄0刺

呢個兒童跳樓機，仔仔總共連續玩咗成 10 幾次啊

呢個咁平淡0既兒童摩天輪就最啱我呢個膽小鬼0刺

自細到大都覺得旋轉木馬代表幸褔0既感覺，好難得今日可以一家人玩哂成個場啊

呢間水母水快餐店訂價比較貴，好在有食物券補貼，我地正在展示仔仔最鍾意0既毛毛公仔 ...

山上面的遊戲比較堅，好多我都唔敢玩，不過點都要陪佢地玩返一、兩至不枉此行0既 ...

最後一站係海洋館，平時人迫迫但今晚可以好順利咁行完0刺 ...

總結成績係好好玩，不過時間就趕 d ，我同仔仔一上到爸爸車，就累到疊埋一齊0係後座位度瞓著咗0刺