時光倒流，講番轉頭。５月３１日回港

星球六月放成個月School Holidays, 如果唔同小明返ＨＫ，我真係唔知點同佢消磨呢個假期。

去到機場了，幾開心。

不過小明唔算好好精力，人仔細細，成日嗌攰。

今次又係我同小明打頭陣返ＨＫ先，老公兩星期後返，即是我又可以痴住媽媽兩星期。老公送左我地入閘後，小明就開始黎料，又要咁又要咁，去到borading時，佢問我攞餅食，我話上左飛機先啦，佢唔肯仲大聲喊添。全部人望過黎，不過我唔怕，我面皮厚，我唔會讓步。結果小明先輸一局。

行去上機時，又話＂唔坐飛機，唔坐飛機，暈車浪＂，同佢講唔坐飛機點見婆婆？

佢答我行去。一路行一路氹。

一上到飛機，就問我攞餅食（佢仲記得我話上左機先食），如是者，佢不停咁食野，食完佢既兒童餐，以為佢會瞓一陣，點知佢又無。開左Ｄ卡通比佢睇，又比佢見到左面位女士食既生果餐，佢一見到人地有士多啤利即刻兩眼發光。細細聲同我講，佢好想食。我同佢講係人地既，去到ＨＫ再買比你食。跟住那位女士好好人咁＂弟＂過黎比小明攞一粒。（位女士好醒目，可能小明想食到出晒面喇）。

套卡通小明重覆睇左廿次有多。佢都唔瞓，我睇緊個套＂handsome suits"，睇睇吓又比小明off左我。算啦，見差不多到。

跟住小明無啦啦搵左個嘔吐袋出黎問我係咩黎？心諗＂咁邪＂，

答佢＂嘔吐袋＂

明：用黎做咩？

我：呢，你記唔記得Bean bean哥哥（Mr Bean),係飛機時咪有個小朋友唔舒服要嘔落個袋到。

明：（佢扮吹脹個紙袋拍爛嚇人）

一會兒。

明：媽ＭＩ我好唔舒服，。。。。。（就向住我隻左腳嘔。）

嘩，即刻搵個嘔吐袋，（小明仲嘔緊）真係想講粗口，仲要met開先用到。手忙腳亂下，都嘔左３－４野，小明嘔完。

好彩一開始怕佢凍，又怕佢食野整污穢件衫，用左張被冚住，小明係咁話好驚好驚。同佢講＂唔洗驚，嘔之嘛，嘔左舒服晒無事架喇。＂同佢入洗手間＂浪＂口，換衫，撞正landing，搖到我。好彩又無人趕我出黎。

幾經辛苦，終於到埗。

一出黎見到二哥，二嫂黎接機，即刻感覺舒服晒。多謝二哥二嫂。