芝麻糖

今日星期六, 原本唔駛返工, 但我參加左醫院的步行籌款, 由醫院行到鯉魚門渡假村再折返醫院.  天氣好好, 仲好曬, 曬到我有d口乾, 仲汗流浹背...

早上八時許已見到長命斜 (山邊) 的鐵c網上有件...

上面有明顯白色狗毛... 附近有隻死都唔肯離開件衫的傻狗女... 頸上有鐵鏈...

1500個同事響呢隻狗身邊經過, 竟然冇一個人關心佢...

直到接近中午, 竟然仲見到呢隻傻狗響樹等主人! 佢曬左好耐, 一滴水都冇, 我就88掛掛咁返落筲箕灣買個飯買枝水, 帶埋狗兜同狗帶, 爬返上長命斜搵佢...  佢又真係仲響樹等... 俾左d水佢飲, 飯就唔肯食, 成功接近就即刻落帶, 佢又冇反抗, 只係有d緊張...

一隻好乖好乖o既唐狗女, 腳仔唔好都一路跟住我行冇停過...

由唔肯俾我接近, 到可以俾我整個抱起, 佢咁信我, 仲可唔可以扮時運高睇唔到???

唉... 自情人金後再一次自尋煩惱...

帶左佢去亞歷士度, 檢查身體, 佢大約3-4歲, 起碼生過一胎 (唔知有冇絕育??) 肚仔有個瘤, 相信係良性的, 透過簡單手術就可切除, 心跳呼吸都正常, 皮膚有少少紅, 兩邊手爭有長期磨地的肉枕, 五對奶滋有四對都係mungmung梅dum dur, 唔算太瘦, 但見肚仔明顯餓到扁左... 四隻腳仔冇力, 但關節冇事, 相信係因連續幾天擔驚受怕受盡風吹雨打誘發全身肌肉的炎症, 耳仔眼仔牙仔都冇大問題, 只係污糟d... 於是乎同佢打左兩枝唔記得咩針話可以令佢放鬆同冇咁虛弱...

亞歷士知佢唔肯食野, 就開左d 維他命同開胃藥, 加一個course的抗生素, 希望我盡快搵個安全的地方俾佢休息, 等佢可以好好訓返一覺, 增強抵抗力, 否則好易打殘~ 呢個星期要有人定時餵藥, 留意便便同vv等細節, 睇下會唔會touchwood有其他長期病患需要抽血再驗~~

見d藥包上面 "寵物名字" 一欄被填上 "NA", 真係有D唔好過...

em... 等我幫你起個名先.... 你又黑又白一點點咁, 好似芝麻雪糕, 就叫你做芝麻啦!

你係一隻唐唐, 仲要咁細身, 名副其實一粒芝麻糖啦!!

同亞歷士傾開發現芝麻o既經過, 大家o既結論係:

條8街蓄意遺棄狗狗, 怕狗狗跟住佢, 所以縛件衫響鐵c網, 等狗狗以為主人會返來接佢!! 你條8街咁賤格, 鬼唔望你第時個仔劈你響街唔要你!!

返到筲箕灣, 又一次要麻煩到rainbow仝人, 先同芝麻沖涼, 聽講全程都好乖, 只係有d驚...

佢入到籠好似好安樂, 周圍好多人又風機聲又狗吠聲, 佢都立刻捲埋一舊大覺訓~ 似乎前幾日流落街頭的生活真係好淒涼...

俾佢訓一陣, 我自己都返上樓沖個涼, 落返去開罐wellnxss 罐頭俾佢, 撈埋d藥粉, 佢終於肯食野, 開心死我!! 食飽帶佢出街行左轉vv, 返到rainbow佢自己boomboomboom走返入籠, 似乎好鍾意呢度~~ 有瓦遮頭, 有一班哥哥姐姐照顧, 仲有條腸響斜對面個籠度陪住佢~

希望你今晚有覺好訓, 聽日就車你去怪獸爸爸度好好休養, 再努力幫你rehome~~

大家邊位想要一隻又乖又忠心又乾淨又細身o既狗狗做伴, 就快d聯絡我啦, 記得幫我周圍fwd呀!!

乖豬~ 錫晒你~~

settle左果粒糖, 就醒起屋企有呢粒糖等緊我....

搞粒芝麻糖搞到我好累好累... 大小姐walk唔夠一粒鐘就俾我扯左返屋企, 扁晒咀...