囡囡曳時識玩眼神

講起囡囡啲曳嘢，就不得不提佢賴尿。
由於BB囡囡唔鍾意响屋企便便，試過舖尿片，不單止唔肯痾，仲咬到爛晒，我哋返工早出晚歸，屋企無人陪狗狗，所以佢哋去便便就只有早晚落街兩次時間。
BB係死忍難忍，不論大解小解，點急都唔肯屋企痾，就算八號風球無辦法落街，困佢响洗手間成粒鐘都唔就範，最後要冒住風雨車佢出去有瓦遮頭的地方。
雖然囡囡肯在廁所搞掂單細嘢，但由於特殊嗜好食廁紙，為免佢搗亂，我哋出街必關廁所門。當我哋好夜都未返，囡囡就會選擇賴尿，其實我唔介意佢賴，只係最驚佢哋忍壞身體。
不過，激氣係有時我放假，出街晚膳前，提早黃昏先同佢哋落街一轉，飯後回來，竟然見到囡囡單細嘢在廚房門口出現，「明明落咗街，做乜嘢又賴呀！我都預咗返來再同你哋去多轉啦！」真真激氣！！！呢個情況往往响冬天發生，夏天比較少有，可能天氣凍唔忍得。

囡囡每次衰咗被發現，就會咪起對眼，眨下眨下，兼摺尾鬼鼠行，識 咁多蠱惑表情，都唔知邊度學返嚟！