8-Feb

昨晚發左一個好恐怖既夢，就係夢見我想去洗手間，但係洗手間好污糟，去唔到，於是我轉身走啦，點知後面有野拉住我，仲將我吊起左半空，我好驚，一嗌救命，個夢就完，即刻醒左，個一刻真係好鬼驚，係咁透大氣，P仔又返左工（新年前呢段日子都係返零屒4點）。

其實呢類同洗手間有關既夢，我已經發左好多次，一係污糟，一係無門，一係好公開（即係好多個坐廁放埋一齊），係人都睇到，次次地方環境都唔同，但係都係係洗手間，就係唔比我去，上網睇返解夢既資料，原來係話我精神過度疲勞，所以先會有咁既夢境出現，而家返緊工，就唔出奇0姐，但係之前我無返工，都會發呢種夢個喎，唔通想暗示我厭世！

今日返工，車程出奇地快，買埋早餐返公司慢慢嘆。

食完早餐，第一件事問亞sir有無睇過我做個本相簿，有無問題，點知佢又話無睇過，我叫佢快d睇，無問題我就照做多一份比高層，次次都係咁，又話急，叫佢睇又唔睇，又係度追…追…追…，頂，我真係睇下我仲可以忍得你幾耐！

第二件事就緊係上網check下出左糧未啦，10點check未出喎，11點就打去問人事部啦，費事一早打去問啦，人地好唔老黎架嘛，晨早追債咁，點知問左成日，又話叫我晏d check下，3點半check都未有，又打去問，到放工啦，都未有，前前後後都問左五、六次，天呀，個條友攪乜架，不過，返到屋企附近，再check一次，終於都出左啦，真係謝天謝地，幾驚無錢過年呀，我地仲有好多野未買架。

check完數無耐，P仔公司打黎叫佢返公司幫一幫手，於是咪等下囉，又同貓貓玩左一陣，之後我地去左間茶餐廳食野。

唔知點解呢排無乜心情食零食咁既，以前都唔係咁架，唔通我有病？過左新年要積極減肥，又實行我個地獄式麥皮大計先！

@080210