五月廿二日

今朝jasmine問有冇人做過美金本票喎, 跟住佢就攞咗份form嚟問喇! 開頭我都諗唔係同港紙一樣架咩, 但係佢拎咗張form過嚟, 我又好似未見過架喎! 跟住咪叫佢入去問iris攞本票, 順便問下係咪同港紙做法一樣囉! 喺呢個時候, 佢就打電話嚟喇; 咁我就唔理個客走咗去聽電話! 但係佢喺度問我冇客咩, 問我開門唔係應該好多客架咩? 咁我就話佢打嚟唔係淨係睇我有冇客呀? 但係佢之後都係冇乜特別嘢講架喎, 都唔知佢打嚟做乜?

今朝有個客嚟入錢, 咁我見佢都有錢, 又有基金, 就叫佢review下啲基金, 聽下啲高息嘅產品啦! 佢又肯喎, 咁就帶咗佢出去俾angela喇! 跟住有個客嚟幫公司打簿同唔知做咩嘅, 跟住我sell佢做banca, 佢又話之前都有同事電話sell過佢喎! 咁我見佢之前有人sell過囉, 咪sell佢做醫療囉! 但係佢又話醫療佢都有, 唔會考慮, 不過就諗退休儲蓄嗰隻囉! 咁我就話我哋有保誠嘅同事喺度俾到啲資料佢, 不如出去聽下! 但係佢話而家要返工, 話晏啲食飯落嚟聽喎! 咁我問佢幾點度啦, 佢話1點! 跟住佢仲問我幾點食飯; 我話點半, 佢仲話1點度嚟嘅! 但係佢就一直都冇嘢囉!

wendy琴日同connie講咗, 咁我哋問佢俾咗信老細未啦; 點知佢話未打信喎! 佢話唔記得咗打喎; 乜呢啲嘢都會唔記得架咩? 如果你真係想唔做嘅, 又想即刻走嘅, 點會唔即刻打信呢? 跟住阿妹同iris叫佢即時喺hogan度打, 但係佢又話唔識打喎! 咁阿妹就讀俾佢打啦, 但係佢又唔打喎; 阿妹跟住就話睇唔過眼幫佢打喇! 有乜理由咁大個辭職都要人幫佢打信架? 我話叫阿妹由得佢自己打囉, 縱鬼壞佢呀! 但係結果佢都好似仲未遞信喎, 都唔知係咪真係走嘅?

晏晝有個PB客嚟入錢, 咁我見佢80幾萬喺戶口度, 乜投資都冇, 咪同佢講話簿仔好低息, 話介紹番啲高息啲嘅產品俾佢嘅! 佢都好似有興趣咁嘅, 但係就話唔得閒喎; 咁咪留電話囉!

跟住有個外國人嚟話佢張卡食咗, 想話攞錢, 咁我問佢攞ID啦! 佢俾咗個passport我, 但係我又查唔到佢有account喎, 咁先知佢轉咗passport! 咁我咪叫佢拎過個舊嘅passport嚟囉, 佢之後嚟番嘅時候, 我喺阿妹度同佢傾計; 咁我就叫阿妹接啦, 我費事行番個位度接佢! 點知原來佢帶嚟個passport我哋個record又冇喎, 咁咪用佢個名嚟check囉, 發覺佢係用身分證嚟開戶口架! 但係佢又話冇咗個身分證喇喎, 咁咪問officer囉, 對過啲電話地址冇問題就幫佢攪喇! 跟住個客又話想買樓, 想睇番按揭啲資料喎; 早知我接番啦! 但係如果係按揭嗰啲, angela係唔簽嘅, 不過angela話都有同佢傾其他嘢所以都有簽到! 跟住個客走咗之後, 我哋先發覺原來佢張卡係block咗架, 應該要同佢換卡! 之前我睇唔到佢profile, 我仲同佢講話張卡會寄俾佢添!

放工做完嘢, 我哋又走咗出去同佢哋傾計! 跟住阿ming見到jasmine哋去完toilet返嚟話angela有嘢睇喎, 但係angela見到我就話冇喇! 但係之後傾傾下, angela就叫我哋睇喇, 原來係allen同幾個男人開party, 喺度扮女人, 上身仲要戴bra架! 點解佢哋個team會玩埋啲咁變態嘅嘢嘅? 但係我哋都覺得呢個造型好襯allen lo呀! 哈哈! 玩完之後, 我哋就返入去報數! 今日又係大家都冇乜數; 係iris有一隻excel, 一個banca囉! 今日都好快攪掂啲嘢, 6點鬆啲就走得喇! 跟住喺我返到大埔嘅時候, 佢又打嚟喎! 佢問我有冇入到, 我話冇! 跟住我問佢有冇入, 收市幾多, 佢又話冇睇到喎! 跟住同佢講多兩句, 佢又話要瞓覺喎, 都唔知佢打嚟做乜?