網誌分類：BeBu歷險記 |
尋日返夜更，簡直就係一個地獄既夜更，我好耐都無試過咁。
一開工未夠2030，大約係2027已經有轉不省人事，咁當然會接日更既手，呢轉call等我地去，咁佢地就可以準時收工啦。去到個公園，我諗現場圍左超過20人係到圍觀，一路做野時，人地總係鍾意指導你去點做，我地心諗走為上著，上到我地架車先慢慢攪。做一轉呢啲call，個人既腎上線素，皮質醇都唔知升高左幾多倍。
去到醫院，攪店之後，又返局。中途已被控制中心擊落，收轉超長途既call，情況係(SOB)氣促，劈住去都要成廿幾三十分鐘，而家仲話諗住實行分級制，分級制下，SOB一定要會係第一級，即9分鐘內到場，但我地要成30分鐘先到場，因為幾區都無哂車，所以我都唔係好知將來會點分級？都無車既時候，你仲可以點分級？點樣係9分鐘內到，直昇機可能得既.............
之後由現場送個傷者去醫院，旅程又係要廿幾分鐘，深夜時份再加上個傷者stable，咁我就唔會劈住去醫院既，穩定車速就ok啦。行行下，係呢個時候，咁岩我從倒後鏡睇到有架私家車係我側邊一齊行駛緊，當我無再理果時，突然一聲巨響，果刻我覺得自己腦海一片空白，呆左一兩秘，之後好快警覺返，望一望後鏡，睇到我側邊果架車轉灣入小路果時與另一架車相撞，果陣時我真係以為係我架車撞，感覺好震撼！心都寒埋，從來未試過咁驚險。原本好眼訓既我即時醒哂.........跟車落車睇下咩事，無人受傷，唔駛送院。但真係好驚羅，以為係自己有事........但見自己仲坐係到，應該無事啦.........
接住落黎係成晚無停過，直至收工為止，楂車楂到我pat pat都痛。深夜時份，我地3個呆滯指數已經去到100，去到老人院，我既呆滯指數稍為低返啲，有70........
朝頭早收工返到屋企，已經頂唔順！唔得啦我！即時訓覺......醒返果時已經係夜晚.....唉...咁就無左一日day off！！！
