BBQ見真誠

今日由於好多BeBu車被某間醫院捉哂去做長途轉院call，攪到剩餘既BeBu車工作量都大增。

我拍住BeBu，連續做左幾轉都返唔到局，一出醫院門又中第二轉，不停咁做。轉轉都係芝麻綠豆call。無幾耐收到有單話想自殺既case，上到樓，見到三位警察已經到左，我地拍極門都無人開門，仲聞到有陣炭味，但我地都入唔到去呢，呢個時候點算呢？搵消防爆門？眼見情況緊急，三位警察落去警車到拎工具爆門，我地三個又set好我地要用既儀器。睇見警察佢地係咁爆爆爆，終於成功爆到個門啦。入到屋，我地好合拍，三位警察都好識幫我地手，各自各分工，警察先生先拎開個BBQ，用水整熄，我地就開始為個傷者急救，救護隊目再叫其中一位警察幫手睇下附近有無藥樽之類既野，警察佢地好快就搵到，再幫下其他手。無幾耐消防黎到，見無門爆，又走入黎睇下，又企係我地側邊，又行下咁，最後都係果句＂師父，咁呢到交俾你地啦＂

成個過程，我覺得果3位警察係有個熱誠既心，知道情況緊急，唔會跟足所謂不同部門不同政策既程序，照道理，佢地真係可以等消防黎爆門，而佢地都可以唔幫我地手，不過佢地無咁做，因為救急扶危，唔係有記者係現場先落力做，俾我睇得出，真係幫人，真係急人所急。

難聽啲講句，自己消防處都未必會幫我地手，一爆完門就走架啦，野都唔會幫我地拎下，除非我地主動要求啦。不過有時急起上黎，掛住照顧個傷者，到準備想抬落樓果時先醒起有5位消防員可以做man power，可惜為時已晚，人地已經走左，唯有三支公抬落樓啦。

係到真係唔該哂幫過我地手既警察，唔該哂幫我地拎唔係人拎既急救袋。

後記：做完果單BBQ後，個人救得返，因為發現得早。但我成身已經一大陣炭味，真係令我諗起燒野食果時，之前覺得啲炭味都可以接受，而家已經唔太鍾意啦，死啦...咁攪法，以後我咪唔鍾意BBQ?