惡劣環境

今日幫BeBu車加加油油，打打氣後，我就開始進食我既午餐啦，由於得返我一架車係局，唯有將啲飯有咁快得咁快倒落個口到，好好彩竟然可以係15分鐘入面倒得哂，時間岩岩好，即時有call到........

收call係不省人事，BeBu車發出閃亮光芒配合嘈吵既尖叫，就好似對一個生命既呼喚咁，不消幾分鐘就到左啦。一開Lift，幾個保安加幾個街坊等緊我地，已經知道呢轉唔係的士call。即刻走入屋睇下咩事，入到最入既廁所，見到位阿嬸訓係地下，LOC，GCS三條一，好彩仲有pulse同埋breathing，不過weak。現場環境太惡劣啦，對腳＂噹＂係馬桶到，頭訓係地下到，下身好多糞便(失禁黎)，上身就有嘔吐物，地下又多異物，又濕又滑，我地唔理咁多啦，照俾氣，試下放OPA，呢個時候就要load and go走啦，但個廁所真係太細，我地3個人要夾手夾腳抱起佢搬去我地一早放係門口既床到，但我地都踩中地雷，攪完一輪之後，又極速去醫院。最後救得返，好彩佢屋企人發現得早，因為佢個口都好多嘔吐物，我地幫佢抽返出黎，如果佢地屋企人遲左返黎先發現就.......................

其實呢啲環境都未夠惡劣，公廁仲惡劣，特別係一啲道友，地下又針筒又大便小便，好似屎撈人咁，上到車後再大便過，我睇住張床單慢慢咁變色.........

今日呢個case已經令病病地既我，即時醒返......不過收工後又係好累，要再食多兩粒藥先......