千奇百怪

香港地真係咩人都有！做轉call既地址唔清晰，打俾報案人，講野＂199＂，都唔知正確地點，唯有跟電腦路線圖去，去到見到唔對路，唯有返轉頭。最後見到有人揮手。我地一停底，已經有十幾人圍住我地同埋bebu車，一黎已經有人拍打我地心愛既bebu車，再問候我地娘親，又話個人死左喇，上左的士喇！場面有如古惑仔年代陳浩南，山雞吹雞講數一樣。更加令我覺得好似呢排上映既南京！南京！ (City of Life and Death)，我地就好似當時手無吋鐵既中國人一樣，俾日本仔圍住。

我地可以做既就係唔落車，眼望前面，當聽唔到。唔夠幾十秒，架的士原來未開車，我地就落車幫手。我一落車先聞到個問候我地同埋拍打bebu車既阿叔一身酒味。then抬左個女仔上我地張床，點知又有一個痴線仔上前捉住我地張床唔俾我地推返上車，大叫老婆呀，唔好死呀！呢個moment，我又再一次聞到唔知係芝華士呀，籃妹呀，矛台呀，定係XO既味道。

最後有位應該係位女仔既媽媽幫手先推返張床上車。其實個女仔無事，一切正常，只係同條＂酒是故鄉濃＂既痴線仔老公嘈完交先氣促！

bebu車立即開動走人，費事對住呢班香港既敗類。佢地質疑我地遲黎，但我地即使搵錯左路(已經跟左電腦地圖行)，已經比警車早到場。果班所謂好朋友好親戚第一時間唔係幫手，反而係起哄。

一諗起自己要交稅俾政府去資助服務俾呢班人真係覺得不值，不過香港既社會生態就係好畸形，往往有人窮到死，執紙皮都唔食政府，食自己。反而行得走得就叫bebu車，而家仲不特止，好似欠左你咁，你試下係大陸，睇下彩唔彩你，真係身在福中不知福！