救人?害人?

前排做一單不省人事, 我同新bebu車一齊出發, 路程都好遠下, 簡單黎講即係果個區無車, 要搵黎自遠方既我地黎.

咁樣既情況下, 一定會有消防員到場, 佢地實會快過我地, 因為區區都有消防局, 但救護站就唔係區區有. 我地去到, 見到消防同事係到, 仲見到個阿伯訓係床到無動靜, 心知不妙. 但係消防佢地無做CPR, 又無駁AED, 咩都無, 就咁企係到. 原來係阿伯屋企人唔想救, 想佢自然咁走. 但咁既情況下, 真係害死人, 係害死我地個IC.

如果你係我既IC, 你會點做? 你會第一時間做返CPR, 定係現場証實佢死亡而唔做呢?

答案就唔會開估啦....

不過消防今次真係做得唔係好岩. 第一, 你到場後, 人地屋企人要求唔做, 你認為可以嗎? 如果佢屋企人本人好憎佢, 想佢死好耐呢? 第二, 消防, 警察都唔可以現場証實傷者係明顯死亡而唔做, 因為只可以由救護員決定. 其實佢地一到場後, 就算家人反對, 都要照做CPR, 咁就唔會有呢件事發生, 更加唔會害到我地走入左人生交叉點.

不過佢地一見到我地到場, 又係果句結尾說話"師父, 呢到交俾你地啦, 唔該哂! "

我地真係流哂冷汗, 你走就走得容易呀, 難為我地執手尾......