200公里

昨晚係我bebu車行得比較辛苦既一日，成晚足足行左成200公里。果3位救護員都非常累，特別係司機！睇見真係心酸！我同3位救護員結果成晚都無休息過，不斷咁做左12個鐘，直踩到天光。我地周圍去，去完東，又去西，控制室一時又叫我地去第2區，一時又叫我地去第3區頂更，走黎走去，我都頭暈咁制。去到天光時份，我已經頂唔順，好肚餓，救護員司機就俾油我飲，飲完又去車啦。

成晚做左2轉超長途既頂更，2轉又係超長途既轉院服務，另外有啲街case，都係肚痛果啲。另外我偷聽到有單case既家屬向救護隊目講話想去指定既醫院，我即時係到計下行幾多公里先，嘩......來回起碼要60公里以上，做一轉呢啲call來回起碼2個幾3個鐘。我果時係到諗，點解啲人可以咁自私，想去返自己住果區既醫院，可以方便自己，但係有無諗過你又咁叫車法，人地又咁叫，咁我地果區咪無哂bebu車？如果真係有緊急事故發生呢？呢啲常識係人都識諗，但啲人唔會做！

到朝早0830，我既3位拍當幸運地可以準時收工，聽到佢地話去食早餐，咁又係既，做左成晚，梗係要對自己好啲。因為除左自己，部門都唔會對佢地好！最後我睇住佢地換返便服就走左啦，但係我要再工作落去，第2更既同事又上我架車開始新一天工作，呀....唔記得講，我係24小時工作，無得休息，除非我唔舒服要入廠，咁就可以苟且偷生。