純粹懷舊而已 - 蓮香樓

屋村(邨)仔 司徒Bee 唔多喜歡出入 "高級" 食府，嫌佢侷侷促促，連食野都要作作狀狀咁； 相反地就特別鍾情『地茂』美食，鍾意佢夠地道市井，價錢一般亦較大眾化。

所以想同大家介紹一 D 我個人幾喜歡、或者係特別少少嘅『地茂美食』。 若然大家唔嫌棄地方唔夠企理、服務態度可能欠佳、顧客質素亦隨時令你卻步的食肆......   或者、可能、maybe...佢地會得到你歡心的。

首先登場嘅係：中 (上) 環 『蓮香樓』

『蓮香樓』係 香港 僅存嘅舊式茶樓之一； 以我角度來演繹何謂『舊式茶樓』，可解說為歷史久遠、仍有茶盅供茶客茗茶之用、仲用緊舊式茶煲為茶客添滾水、茶博士(侍應) 極具個人風格、仍有提供港式老點心、不設點心報紙俾你 "剔" 點心、受歡迎點心出籠要自己搶、要自己搵位、可供搭枱、地下仲有個痰罐....... 等等，最衰佢已經用點心卡計數，否則仲有風味。

一家三口就係掃左下列點心：

1. 一系列自家名堂茶具及茶盅(個人茗茶用)  2. 豬肚燒賣 (豬肚有咬口，但未夠爽)

3. 豬潤燒賣 (失望，豬潤唔鮮兼太熟)   4. 燒賣 (GOOD!! 夠料實淨，有舊日風味)

5. 鮮蝦餃 (餡料夠新鮮，但餃皮太厚)   6. 鮮蝦粉果 (OK，其他地方唔太易食到喇)

7. 豉汁蒸魚頭 (豉味夠香，又唔太重麵豉味，正)   8. 鴨腳紮 (料削味淡，勁差!)

9. 淮山四寶紮 (淮山硬兼唔入味，特登架？)  10. 脆麻花 (化但不鬆，又唔夠蜜糖~)

11. 千層糕 (奶王及蛋都好香，Yummy!)   12. 燒腩卷 (唔夠肥，但女士食得開心)

< 埋單約 HK$170 >

『蓮香樓』經過咁多年，經營手法及風格仍能盡量保持原貌，實屬難得； 但係茶樓嘅靈魂人物  -『點心師父』始終難免轉左幾代，所以我覺得真係食唔出我細個時嗰種味道，亦可能係多年來食物選擇多左，味蕾已經麻木左吧？ 總結今次一行，未能有預期的回憶拾趣感覺，只是純粹硬懷舊一番而已。

地址：香港 中環 (我始終覺得佢屬 上環) 威靈頓街 160 至 164 號

電話：2544 4556