舊公司最新既鐵腕政策

啱啱收到舊公司同事既message，佢話公司要佢哋簽一封信，辭職要兩個月通知。點解公司唔唸下用咩方法留住好員工﹖﹗用鐵腕政策可以咩﹖﹗ 

要走既同事始終都會走...........縱使而家經濟差，但公司仍然不断有人走，可想而知有問題既係間公司，而唔係離職既同事，今日就鐵腕政策，聽日又唔知會點﹖

舊公司老闆做事方式真係好有問題，日常要實行問責制，要大家互篤對方，互數其他部門既不是。有段時間，老闆日日返到公司好似痴咗線咁，日日都揾人出氣，每朝返到公司就"殺氣好重"，個個都人心惶惶驚唔知幾時輪到自己，工作士氣差到極點。

實行問責制可以接受，但真係有事發生既時候，阿頭會揾下面細既負責，明明唔關你事，係佢自己部門既事，但都可以拉第二個部門既人落水，呢啲唔係問責制，係"A字膀"，不負責任行為﹗但老闆又buy......你可以點﹖﹗

以前自己都受過呢啲對待，好無奈好無奈...............明明被人屈，但阿頭一句"我當時唔喺現場"，就可以置身事外。既然有事無事都要自己搞掂，部門阿頭肩負咩責任呀﹖﹗成日用一副愛莫能助既樣對住同事，同事點會服你呢個阿頭﹖﹗

自己當時辭職既原因多多少少都係因為部門主管處事既方式，當然最大原因係有問題既公司政策。同公司講既辭職原因當然係好冠冕堂皇喇﹗想出去試下其他行業，開闊自己眼光等等，留有餘地日後好相見嘛(數阿頭或公司不是，對我/其他人都無好處，反正又唔會因為我而改變啲咩。)

公司係屬於中小型企業，但內部既指引，程序，規則，條例等等，形形式式既內部要求多到你唔記得。無論發生咩事都好，檢討過後一定要你寫份詳細既程序或者指引出來，以防下次再次發生。但呢啲所謂既指引實在太多，多到寫完簽批完就無人理會，亦好少用返份指引。有時自己都覺得好好笑，自己嘔心瀝血，轟轟烈烈寫完份嘢，但亦好快從此消聲匿跡，無人記得份嘢既內容

所謂既指引或者程序，對於一間公司來講當然重要﹗因為呢啲資料可以幫助公司/新同事容易掌握工作，但過多而又無人理會既資料就如同虛設，個個同事只係知道寫完指引先可以完結件事，但真正需要用返份指引就少之又少。另一方面，一啲過時又欠缺彈性既指引又根深柢固，當你做到你急時佢唔急，再加多一句 "我都係跟足指引做"，真係令人嬲到極點，唔通呢啲事又走去同老闆投訴呀﹖﹗我哋只有無奈加無奈....

老闆口講話好民主，好正義，任何事都唔會偏私任何一方，但用人至親，至親講一句，任何人都無得留底，理得你做咗十年定八年，總有辦法令你自己走。一間好傳統既公司，加一個傳統思想既老闆，點會有好既管理層﹖ 就因為佢既做事手法，個個為咗份糧都敢怒不敢言，再無道理既要求都會跟佢意思去做，除咗我呢啲有自氣既員工 (收場就係自動離職)。

我自己決定辭職時雖然明知經濟差，但再過多一段時間，經濟可能仲差，到時顧慮仲多，勇氣無埋，辭職就更加無可能。於是決定要盡地一舖，縱使要用半年時間揾工，但總好過要浪費更漫長既時間喺呢間公司。

而家只希望所有舊同事忍到就忍，因為暫時經濟差真係比較難揾工，亦希望前顧主手下留情，停止呢啲不切實際，毫無人情既政策，釋放權力，努力挽回同事既工作士氣自然留到人材喇﹗