BLOG 主頁｜ 服務中心｜ 雅虎香港
      歡迎～
      留言

      我的心情

      關閉

      我的心情

      由 2009-10-14 至 2009-11-24
      上6個
      下6個

      網誌清單

      編輯 關閉
      網誌 我的網誌內容搜尋：
      引用 檢舉

      無陰公囉．．．

      網誌分類：我的喜怒哀樂 |
      圖片
      網誌日期：2009-11-24 16:01

      今朝返工前．．．

      心血來潮拎左上兩個星期係小西灣攞返黎我未大肚時既衫同褲出黎～

      我拎上手，第一時間就係對住條差ｄ唔認得係咪我既長褲嘆氣，

      個心又再一次諗：〔咩果陣時自己條褲咁細條都著得到架咩？〕

      ＊＊而且果陣時仲有鬆好多tim呀！！＊＊

      所以話，其實原來做人有時真係唔知足（特別係女人對減肥方面），

      果陣時110磅，仲一味話自己肥！依家生完呢ｄ就真係肥喇！！

      不論坐低定係企係度，個肚舊肥豬肉都仲死要bi出黎！！荒死人地見佢唔到咁！

      生左阿ｂ2個幾月喇．．．實不相瞞，我都仲係著梗ｄ可以調較鬆緊既大肚褲！！

      由陀住阿ｂ既後期到今時今日，呢2條褲，一日黑，就一日灰，

      永遠好似〔梅花間竹〕咁，真係著到我好鬼悶！！

       

      又望返條褲，本著會被激到嘔血既心態，

      膽粗粗想睇下依家既自己點樣可以迫爆佢．．．

      先著右邊既肥脾，OH．．．一個字：〔緊〕！

      跟住試埋左邊，再出盡力用力抽佢上去！！ ！

      用返可以媲美生仔時果種大大啖既吸氣，再彎哂腰，縮縮縮縮埋個肚．．．

      （呢刻唔知點解我諗起蠟筆小新個阿媽 – 美牙，哈哈）

      先勉為其難扣到果粒唔知會唔會爆既褲鈕同拉鏈．．．

      突然間，我又諗返起果句生完阿ｂ後一直係我腦海揮之不去既說話：

      〔有咁耐風流，有咁耐折墮！〕

      當然～話係〔折墮〕又好似誇左ｄ，不過事實係邊個大肚時個口未停過係咁食？

      邊個大肚時，又早餐，又lunch，又下午茶，又晚飯，又宵夜？？？

      中間仲要夾雜埋ｄ朱古力呀，雪糕呀，糖水呀咁！

      最終．．．係呀，係大肚呀，不過肥哂係我度，

      個女就好孝順咁將ｄ營養同卡路里俾哂阿媽！

      結果，由未有阿ｂ到阿ｂ出世前一刻，成個孕期，足足肥左50磅！

      （虧我仲好意思講出黎呀真係！）

      依家就慘啦，係～～著得落條褲，不過都怕飲多杯水粒鈕會爆．．．

      但係～～唔知係咪真係唔想著果2條一黑一灰，我今日居然著左佢返工！！

      最多外面著件鬆身長衫遮下個肚，同埋一對金華火腿．．．

      （仲有，我放心著果條褲出街，係因為著左鬆身長衫，

      touch wood就算粒鈕真係爆鬼左，都遮到～

      而最諷刺既係．．．就算粒鈕爆左，條褲都唔會跌得到落黎，唔使驚！〕

       

      呢刻，我一路摸著果舊死唔斷氣既豬腩肉，一路流左2行眼淚咁打呢篇野．．．

      我要好似以前咁呀！！！！！好似以前咁我就滿足架喇！！！！！

       

      P.S.:

      其實唔止個肚腩，個pat pat都大左好多．．．

      比起以前，依家更加係名副其實既〔豪華臀〕！

      真係無陰公囉～～～

      引用(0)
      共22個回應
      • 檢舉

        我的小魚兒 2009-11-27 18:15

        唔駛驚, 我都生左小魚兒6個半月, 仲有20磅未減....成個夏天,都係著果幾件衫同leggings, 無著過牛仔褲.  因為著得落都好辛苦.....唉, 冬天仲衰, 要著返大肚時d裙呀... 又無時間去做yoga!  總之就係, 有好多人陪你一樣架.....咁妳個心會唔會舒服d呢.....嘻嘻
      • 檢舉

        Goosie 2009-11-27 11:24

        我成個孕程都重左33磅,而家仲有14磅肥肉,開頭以為水腫,原來唔係,連結婚介指都帶唔入啦,莫講話以前d褲,一條都著唔到...
      • 檢舉

        花師奶 2009-11-27 10:42

        我已經生左半年，d 豬腩肉重係係度日日陪住我！我用左好多方法，佢都好似同我好 friend 咁，死唔走！重"痴"身個個女！！！

        都唔知點攪？？？

         

      • 檢舉

        laniep 2009-11-27 09:31

        成功是一把梯子，雙手插在口袋裡是爬不上去的。

        　　　　　　　　　　　　　　　　　　　　　　　　　　　　　　　　 ..................................................
      • 檢舉

        水諄媽媽 2009-11-27 00:18

        我到而家都未收晒肚腩呀，不過好好彩大肚時唔係肥左好多咋!
      • 檢舉

        Canny@Garlic 2009-11-26 22:15

        我都仲有 10 ibs 呀...努力呀!
        檢舉

        ＊囍＊2009-11-27 13:56

        大家彼此彼此, 雖然聽落1X磅, 唔叫好多....... (比起我大肚時重果個數字), 不過我怕最難減就係呢d呢.......

      • 檢舉

        goofybaby 2009-11-26 00:30

        不要給自己太大壓力啦，肥咗是有原因的嘛，你寧願瘦但無生阿女，定係肥咗但有個女女錫住抱住先？我生咗十個半月，頭三個月輕得好快，回復以前體重（不過都係好重），不過身型始終差好遠，到現在，反而肥返，因爲湊女好累，消耗很多力量，要吃多一點，而且停了餵人奶，少了一個燒脂途徑...不過都無所謂啦，或者甘啦，你快d生多個，生完嗮先一次過減肥啦，無謂減完又肥過，又要重新減...
        檢舉

        ＊囍＊2009-11-27 13:51

        咁梗係寧願雖然肥左但有個女啦~ 不過對我黎講, 真係唔可以咁快生第2個, 我暫時仲係有d怕, 同埋大肚其實唔係我想像中咁"幸福"架, 我果時因為種種原因, 真係好想快d生阿b出黎........... 咁難得先過左呢10個月, 唔想咁快又要再辛苦......... 仲有呀, 人地話生第2胎會比第1胎難修身, 所以我依家要起碼去返以前咁重, 先敢再有bb, 如果唔係, d磅數好似層層疊咁每胎增幅...... 想第日唔做肥師奶都難呀真係!!
      • 檢舉

        block0903 2009-11-25 17:28

        吳關產後肥胖的問題......

        但我不會生第2個BB了....

        檢舉

        ＊囍＊2009-11-27 13:42

        一個夠哂數~~
      • 檢舉

        block0903 2009-11-25 15:22

        我都好大鑊

        這次懷孕,至今生了喜喜已120 days 我仲有廿多磅肥豬肉纏住我

        令好困惑 . . .  好討厭  不知怎好... 

        當務之急, 要盡快解決 ~

        檢舉

        ＊囍＊2009-11-25 16:08

        喜喜媽咪, 我突然諗到有樣野想問下您........ 人地話生第一個會易減(不過睇落好似唔多係, 至少我依家都仲係咁既款....... 而且見到咁多位媽咪都訴苦.....), 不過生第二個就難減, 咁您仲有無打算生多個~?

      • 檢舉

        牛皇BB 2009-11-25 15:05

        唉.......我深深明白到, 我估除左kelly  chan 生完好似無生過外, 我地個個生完都有大肚腩, 龍"登" 皇, 我仲慘呀, 隻手臂肥到好多外套都著唔到呀, 真係no eye see.....睇落又似c 9 wor, 慘不忍睹~

        好彩你仲後生, 慢慢keep 返, 一定得ge, 加油~~

        (你講起美牙....比你笑鬼死我)

        檢舉

        ＊囍＊2009-11-25 16:01

        咪係囉, Kelly真係好似無生過咁....... 我阿b同佢個仔出世都係差唔多重, 不過人地就無咩點變, 我就肥左咁多.............

        哈, 牛皇b媽咪, 您一定係同我一樣睇過美牙好辛苦想著條褲果個情節呀呢~~~~ 我尋日朝就好似佢咁架, 只係好在無個小新係度搞屎棍啫~~~ 哈哈哈~~~

      • 檢舉

        小米媽 2009-11-25 14:23

        唔好唔開心喇...我生左小米差不多4個月都仲未著到之前d褲呀....而且仲要買過d新tim呀.......你番工好快會痩番架咋.......放心喇....
        檢舉

        ＊囍＊2009-11-25 15:18

        小米媽........ 最弊係我返工返9個鐘, 8個鐘都係要個pat癡住張椅架(係公司盡其量咪行去斟下水呀, 去下廁所呀咁, 行得幾多吖)!! 有時我覺得唔使返工可能仲瘦快d...... 因為鍾意行又得, 企又得, 做運動又得呢........
      • 檢舉

        Mandy & Fai 2009-11-25 12:57

        我咪又係一樣...仲要望落人人以為我瘦返晒..其實仲有成廿幾磅...個PAT大咗好多...都唔知點攪...唉...真係唔知幾時先可以瘦返...我而家已經開始自己做運動KEEP FIT喇...唔知得唔得呢
        檢舉

        ＊囍＊2009-11-25 15:14

        您打算做咩運動呀?? 您有呢個決心真係好呀! 我就係衰在懶.... 係公司已經日坐夜坐(您話吖, 係公司成日坐係度, 盡其量咪行去斟下水呀, 去下廁所呀咁, 行得幾多吖~!), 但係放工返到屋企對住個女, 又無心情去做運動喇bor! 不過唔知係咪阿b"孝順"....... 佢唔俾我坐係度抱佢架(除非佢訓左!), 一定要我企係度, 一係就來來回回巡遊成間屋, 如果唔係佢會喊架(不過佢唔會咁對我奶奶.... 啤........), 可能連佢都覺我肥, 唔想我個pat日益擴大.......

      • 檢舉

        comeonbabyo 2009-11-25 10:34

        我都仲係著大肚褲, 你肥咗50磅咁多呀? 咁而家仲有幾多要減? 我大肚肥咗36磅, 而家仲有13磅度..... 唉......
        檢舉

        ＊囍＊2009-11-25 11:25

        係呀, 真係足足肥左50磅, 果陣時食野呀, 好似唔使錢咁架, 想食就食, 無咩點停過~ 所以我同自己承諾過, 下一胎唔好咁白痴, 博哂老命咁..... 因為阿b要既唔係呢d....... 到頭來肥哂係自己度!

        我依家仲有15磅左右...... fing唔甩.......

      • 檢舉

        小bb 2009-11-25 10:07

        雖然我未生呀,但係呢種著唔落條褲的感受,係我起初越來越肥,個肚越來越大個時都發生過..我都係諗住試著未大肚前的褲,但著唔落...我當時都好驚自己生左之後都係咁,因為好多人生左都話著唔番..但當時我同自己講..依家有左係咁啦...但相信我都係自欺欺人...我都係大肚後先知點解真係肥既人著衫唔好睇要減肥..而我地呢D原本唔係真係叫肥既人又成日話自己肥...其實一早應該要知足...相信我產後都有排要收身呀!!!  係呢想問你生左個時有無用到束腹帶呀?? 有無幫助呀??
        檢舉

        ＊囍＊2009-11-25 11:21

        講起條束腹帶, 我就更加對佢唔住喇..... 起初打算生完就即刻日束夜束, 打死都唔除落黎, 仲點都要買(皆因好似買左就等於修到身咁....), 買前又對陳生講一大堆"承諾", 話生完一定會束(因為佢話我到時一定唔會束得幾多次, 話我到時會怕熱)! 到依家生完2個幾月喇, 講真....... 我只係坐月時束過一次咁大把(俾陳生知道, 佢實會鄙視我!!), 因為我覺得著左後好似好厚咁, 同埋坐係度時會唔舒服~~ 本身個人已經肥左, 又加埋果舊野, 感覺唔知點咁, 唔係咁想束住佢....... 所以基本上都可以話我果條束腹帶並無用武之地...... 不過, 我就有買左2件好緊既修身背心, 佢係件好薄既背心, 唔會好似束腹帶咁厚, 但有好"cool"住個肚, 之但係....... 我都只係當佢好似打底背心咁咋, 2個幾月以內, 只係著過3 - 4次........
      • 檢舉

        iristoday 2009-11-25 10:06

        妳都係岩岩生完兩個幾月者, 仲會慢慢瘦番落去架, 所以唔洗灰心喎..我雖然睇落係好似瘦番好多, 但係個肚腩仔同'豪雨臀'都係揮之不去, 只係無岩岩生完個兩個月咁嚴重咋...我諗個個生完都係咁~
        檢舉

        ＊囍＊2009-11-25 10:53

        IRIS, 其實我之前睇您都睇唔出您係生左對孖女既媽咪呀~~ 人地生一個固然肥, 但係您生左2個, 依家都只係"肚腩仔", 我覺得您真係好利害架喇!!!! 仲有呀, 之前係屋企上網, 去您個blog度留言時, 陳生咁岩見到, 我同佢講: "呢個媽咪生左對孖女呀, 真係唔似呀!", 佢都愕一愕然, 佢話您一d都唔肥呀~ 係真架!!
      • 檢舉

        nganbergin 2009-11-25 09:57

        健康的身體是事業成功的基礎。　　　　　　　　　　　　　　　　　　　　　　　　　　　　　　　　　　　....................................................................................................
      • 檢舉

        雞旦仔 2009-11-25 09:42

        我都生左饅頭5個月啦, 以前既牛仔褲全部都著唔到呀! 明明以前仲有鬆既, 現在都唔O岩, 每試著都失望呢!

        我放棄了, 所以買過D新便算... 番工我仲有著番D大肚褲架
        人第以為我減左... 其實仲有成十幾磅呀! 成日都跟住我
        不過慢慢係會自然瘦番架! 不過係瘦少少囉!

        我都冇做運動,所以都唔會有咩期望啦! 個肚腩好似有左四個月咁, 次次都比媽咪笑我呀!

        檢舉

        ＊囍＊2009-11-25 10:47

        係呀, 就係因為知道以前明明仲有鬆既褲, 依家居然要咁辛苦去試下著唔著到, 呢種心情真係............

        同您一樣呀, 旁人可能會覺得好似都減得同以前只係差少少, 不過自己只係著條褲呀就知係咩一回事啦! 我都仲係有十幾磅癡住哂!  但係您買過d新之餘, 有無留返d著唔落果d呀? 我唔捨得唔要呀, 因為我好希望見到佢地, 可以當係一種激勵........ 好想係不久既將來, 佢地可以重見天日~

      • 檢舉

        carrie hui 2009-11-25 01:59

        你又吾好咁講自己, 個個生完都要一段時間cover架啦

        我都要等到成4個月先著番以前d牛仔褲呢.. 近排磅過重有10磅肉係身~~

        同你一樣. 個肚鬆到呢 , 無眼睇

        睇番陳生張相佢都好後生下喎~~

        係呢, 個background好靚, 點整架 ?

        檢舉

        ＊囍＊2009-11-25 10:28

        係呀, 依家最怕就係照鏡見到自己下半身~

        好多人都話陳生個樣"0靚仔"........ 其實佢大我7年架........ 3字頭架喇佢! 佢只係頭髮愈短, 個樣就愈細路!! 我真係怕有日人地會以為我仲大過佢!

        至於個wallpaper呢, 我都係用以前同您講果個"PhotoScape"整架, 就係去"版面"度, 選擇您要d相點分怖既格式, 拉d相係您想放既格仔, 咁就ok架喇~~ 好易~ 您都整個好多daniel既wallpaper吖~~ hehe

      • 檢舉

        winCy 2009-11-25 01:35

        喂呀!! 我又係呀!!!

        你試褲的過程 - 我明呀!!! 我都試過
        試完 (根本著唔落，去到大脾位停左!!!) 心情勁 down 囉!!

        我之前的牛記全部唔著得
        半身裙又唔得... 都唔知算唔算係藉口畀自己買衫 =0=
        買的都唔敢係褲... 買的都係 one piece 裙
        裡面再襯褲子o個種咋!!! 因為呢d one piece 可以遮到個腩囉

        我有左... 肥左 28 - 30lbs 左右...
        宜家減返 20 lbs 嫁喇

        之前我太瘦... 得 90lbs...
        宜家畀我減多 5lbs!!!!! 就好了

        希望全減在腩同pat啦

        檢舉

        ＊囍＊2009-11-25 10:08

        照咁講, 您依家比以前都係多左8-10磅左右, 您都著唔落條褲?? 我依家仲有15磅好似吊靴鬼咁跟住我........ fing極都唔甩......

        我記得我以前睇過您d相, 您身形幾fit呀(不過聽數字, 90磅又真係輕左d, 所以您話減多5磅就夠係岩既~), 我諗您依家都係同我一樣肥哂係個肚同個pat, 真係希望好似您咁講, 全部減哂係個肚腩同pat就好喇......

      • 檢舉

        花太太 2009-11-25 00:50

        我就黎生完5個月喇~仲著緊大肚褲~
        早排又好似妳咁試下以前D牛仔褲,咁扣唔到就梗係架啦~
        但要褲腳勁長WOR!!!生完肥左o者~唔會矮左掛~!!!
        睇清楚........原來o個條褲係花先生架~!!!

        檢舉

        ＊囍＊2009-11-25 10:01

        花太太, 您呢個留言令我一大清早就開懷大笑, 哈哈哈~~ 您係咪同花先生有條情侶裝架?? 我尋日朝拎條褲上手時, 都唔係好認到佢~~ kaka
      • 檢舉

        Xie@Family 2009-11-24 23:48

        唉! 我個仔已經5個月有多, 我以前啲褲全部著唔番, 你都好一黑一灰. 我每日返工都係著同一條牛仔褲咋!
        檢舉

        ＊囍＊2009-11-25 09:58

        咁如果果日洗唔切條褲咁點算呀??

        同埋我會覺得好悶, 依家我都覺得果2條褲俾我感覺好似"制服"一樣............  想再買多d衫褲, 但奈何其實我有好多衫褲, 迫爆個衣櫃咁滯, 只係著唔返........... 可憐~~

      • 檢舉

        ♀自然♀ 2009-11-24 21:20

        家姐:

        早晚也會有機會穿回那些衣服!

        只要多做運動就可以了!!

        别把自己形容到那麼.......(金華火腿,肥豬肉,豪華臀)

        加油!!

        棗棗(大妹!~)

        檢舉

        ＊囍＊2009-11-25 09:52

        傻妹妹, 您唔知我依家有幾傷心架喇...... 嗚嗚嗚.......

        不過您地唔好見到我呢篇野就學人減肥喎下, 您地仲係發育時期, 而我就生完阿b後, 肥左好多, 仲有就係您同bi la fi已經係激瘦.........! 知無?? 如果唔係大個女得個"瘦"字, 身形唔好睇架~~ 記住呀!!

      新增回應

      • 1)阿ｂ到Mi婆婆屋企 2)我又向陳生開炮 3)阿b可能凍親

        網誌分類：我的喜怒哀樂 |
        圖片
        網誌日期：2009-11-22 23:26
        尋日星期六，約12:00p.m.我帶阿b去Mimi屋企～ 天氣凍，出街前我都幫阿ｂ著厚左衫～ 由於陳生星期六要返工，所以今次係我第一次自己同阿ｂ出街～！ 因為我覺得阿ｂ唔係咁鍾意揹帶既，所...
        回應(11) | 引用(0)

      • 巧妍鍾意睇電視 = . =

        網誌分類：陳家千金 |
        網誌日期：2009-11-20 11:00
        近呢2個星期發現2個幾月大既巧妍真係好鍾意睇電視．．． 當抱住佢坐係梳化時，佢會望電視； 當同佢掃風時，佢會望電視； 當抱住佢搖搖下哄佢訓時，佢會望電視； 總言之，佢好似好〔迷〕...
        回應(24) | 引用(0)

      • 產後最快樂的星期天 – 帶阿ｂ回娘家

        網誌分類：我的喜怒哀樂 |
        圖片
        網誌日期：2009-11-15 23:32
        早於上星期已決定今日會同阿ｂ返娘家見爸爸佢地， 日復日．．．返工又放工，終於都俾我等到呢日喇．．． 差唔多12:00p.m.先與陳生同奶奶食lunch後，就直接推住阿ｂ向小西灣進發～ （真係...
        回應(15) | 引用(0)

      • 10/11/2009 - (3) 我對爸爸說的話

        網誌分類：我的喜怒哀樂 |
        網誌日期：2009-11-10 23:39
        最後，我想講．．．我知我屋企人好關心我，有睇我呢個blog．．． 其實您地放心啦，我唔係個難相處既人， 老實講，我無對過奶奶有半刻態度欠佳既時候！ 我表達我唔鍾意陳生既親戚黎，呢...
        回應(18) | 引用(0)

      月曆

      編輯 關閉
      <
      2009
      >
      <
      Nov
      >
      S M T W T F S
      1 2 3 4 5 6 7
      8 9 10 11 12 13 14
      15 16 17 18 19 20 21
      22 23 24 25 26 27 28
      29 30  

      更新日期

      編輯 關閉

      更新日期

      2009-11-26 09:08
       

      R H
      G S
      B V

      #