難過

復活節本來係有一個重生嘅意義，但係今年嘅復活節我就有另一個感受。

一個月前我細佬心臟病發去世。正當壯年，世間仲有不知幾多好玩嘅嘢等住佢，但佢就無褔消受。唯有向好嘅方面諗，就係佢突然病發暈倒咁就去咗，冇痛冇剩，走得瀟灑。

細佬係個離咗婚嘅獨居人。有病在身但係又唔肯的起心肝去醫，夜瞓早起亦冇時間搞清潔衛生。對一個帶病在身嘅人嚟講就好似食緊慢性毒藥咁。

回想年幼時一齊喺廉租屋長大，兩兄弟上下碌架床過咗廿幾年，感情算係唔錯。當然，細個嗰時我呢個大佬梗係有「恰」過佢啦。但長大後我地已經變咗好朋友咁，我仲畀咗我供緊層新樓佢結婚添 。可惜佢好快就離婚收場。從此佢變得更加內向，沉默寡言。跟住就到我結婚移民。當年長途電話費仲係好貴，又冇互聯網，呢段日子令我地開始很少接觸。六年後當我回流香港，父母親已相繼去世，而細佬佢就更加變成孤兒咁，一個人住咗喺新界北。就係咁，十幾年嚟我地各有各嘅生活方式，我有我嘅家庭同工作要打拼，我地就只維持每年最多見兩三次面。直到最近呢兩年我開始放低我嘅工作，多咗啲時間走去同佢喺網上傾計。佢臨去世前幾日我地仲用電郵重溫後生嗰陣聽過啲歌，大家都有啲不勝唏噓嘅感覺。

過去一個月我都係忙緊佢嘅身後事。因為佢喺急症室不治，所以啲警察攞哂佢隨身嘅物件包括身份証同信用卡，重要話明唔會發還(因為要防止他人盜用)。咁我就要去同啲警察打交道攞返死者嘅身份証副本嚟辦喪事。原來喺急症室死亡嘅人一般都要解剖裁定死因。咁為咗唔想解剖，我又要去搵細佬嘅病歷同法醫官解釋。仲要去佢返工嗰度執拾細軟，再要用盡辦法搵佢有邊啲銀行戶口、保險、按揭同埋分期付款等。喪禮之後就去佢住所執拾同搞清潔。一個住咗十二年都冇乜點清潔過嘅地方，污糟程度可想而知。但其實我係好樂意做一切呢啲嘅工作，就當係我為細佬做最後一件事咁。

我身邊嘅人見我平時都冇乜同呢個細佬來往，所以佢地唔白點解我要咁辛苦，仲慘過做菲傭。其實我內心係十分難過同內咎。因為咁多年嚟我都冇好好照顧呢個細佬。應該係打死不離嘅親兄弟，我地就變成好似只係萍水相逢嘅朋友。依家做乜嘢其實都係於事無補，只能令我更懷念呢個細佬，更加後悔之前冇同佢好好相處。

香港嘅生活模式同埋節奏，往往就會產生以上呢啲故事。各位，若果你有啲好耐都冇同佢傾過偈嘅親人或朋友，不防今日就打個電話問候下佢地丫。