祝福

好友患咗癌症，群醫束手無策。即將走到人生盡頭，令人哀傷。只嘆人生苦短，一個和藹善良嘅人卻過唔到50歲。一個美好家庭將會變得唔完整。天意弄人。的確，呢個世界係冇公平嘅。雖然我地應該行善助人，但係原來咁樣係交換唔到健康長壽嘅。

有個故事講愛因斯坦仲係學生時問咗教授幾個理所當然嘅問題。就係冷、黑暗同邪惡係唔係存在嘅呢？愛因斯坦直斥其非，佢話：

冷實際上係唔存在嘅。按照物理嘅規律，冷實際上係因為熱能嘅缺乏。 

黑暗亦唔存在。黑暗實際上係指無光嘅狀態。我地可以研究光，但係我地就研究或測量唔倒黑暗。一個簡單嘅光亮就可以打破世界嘅黑暗而照亮佢。您點可以知道一個地方有幾黑呢?

惡並唔存在，至少並唔係自己存在 (或解作: 惡唔係一種獨立嘅存在)。簡單嚟講，惡係因為冇上帝嘅同在，就好似是黑暗同冷 一樣，係人用嚟形容冇上帝同在嘅狀態。上帝冇造就惡。惡唔似信心同愛，光同熱，惡係當人心中冇咗上帝嘅愛嗰時嘅結果。就好似冷嘅出現係因為冇熱能, 或者黑暗嘅來臨係因為冇光一樣。 

愛因斯坦嘅上帝係個物理學之神，唔係我地講嗰個上帝。佢其實係個無神論者。以上可能只係一個故事。但若果佢仲在生我都好想問下佢死亡係唔係存在嘅呢？以佢嘅聰明智慧，我好希望佢有一個唔係理所當然嘅答案。

心情沉重，語無倫次。