人物篇－牛佬２

　思變的牛－時為８６年嘅８月底，玉郎機構準備搬上新寫字樓－灣仔海港中心（玉郎機構８月１３日正式上市），當大家興高采烈地係北角舊寫字樓執野之際，有條牛亦都作出搬遷打算，不過佢並唔係諗住同我地一齊喎，佢嘅目的地係鰂魚涌東達中心－八二畫社的所在地－然哥的公司，即係準備跳槽嘞。

　過檔的牛－道聽途說牛佬係因為係新寫字樓分配唔到房間所以就諗住劈炮：海港中心雖然有成萬六呎，但能夠有房坐嘅只有廖廖幾位，好明顯係身份象徵啦；當時只有黃生（老細），馬仔（中華英雄），傑哥（寫畫部經理），萬有（龍虎門）幾位猛人坐房，我地近佰員工就分佈晒係四周，牛佬當時貴為神掌主編，無房坐當然不是味兒，加上差不多約滿而然哥又落足咀頭力邀過檔，可能係咁於是萌生去意咯，而我諗其實係八二畫社有更大發展空間牛佬至會心動；但過程並不順暢，當牛佬提早作出請辭時，經理百般刁難一定要牛佬履行合約仲出埋律師信作警告，牛佬淡然道：「傑哥，我怕我會無心機做而公司又要硬收我稿，盞搞啫！」此話一出惹火了經理準備跟牛佬來個沒完沒了（上市後公司大把錢點玩都得），還好兩位畫壇巨匠－黃生然哥仲有計傾，私底下放了牛佬一馬，於是牛佬正式加盟八二畫社咯。

　黑鬼與牛－呵呵牛佬離職後我竊竊偷笑，以為會黑鬼昇城隍紮做神掌主編，誰不知比榮仔冷手執個熱煎堆，我只好繼續駁身生涯咯。同牛佬拍檔經年，都發生過有好多啼笑皆非嘅趣聞輓事，最危險係８３年果次：果陣興起一片學車熱，牛佬剛考到車牌馬上出左部日產棍波藍鳥，車左我同科琳等人去灣仔食飯，飯後去停車場攞車，牛佬：「德仔你報左名學車，不如依家試吓揸先！」「我唔識噃！」「嗱！你咁咁咁，有乜事我拉手制就停到啦！」「哦！」呵呵結果係：一聲碰然巨嚮！一部日產藍鳥就將一部停在泊車位的寶馬撞到變成保時捷嘞，而某黑人就用左兩個月人工幫牛佬整車咯，嗚嗚！莫非牛佬係我嘅天煞孤星？

　老馮與牛－過到八二畫社牛佬先接手做「愛情故事」一書，後來連「李小龍」也交由他打理，可見然哥對牛佬器重的程度；牛佬不嬲都好喜歡教導新人，漸漸牛家班開始茁壯，經由他手底下培訓出的有肥良，倫裕國，邱瑞新，吳文輝等等真個人才濟濟；牛佬亦好樂意跟行內高手合作，８７年１０月股災之後玉郎機構蘊釀一場小地震，而老馮係第一個劈炮唔撈者，經友人引荐下臨時加入八二畫社，而牛佬亦將他主理開嘅「李小龍」主編一職交比老馮，當時然哥並不贊同，牛佬拍晒心口：「然哥，稿費係我人工度扣ｏｋ？」就係咁老馮做左「李小龍」主編九個月嘞，呵呵往後就係老馮「刀劍笑」發光發熱的年代咯，亦可見牛佬眼光有其獨到之處。

　合久必分－牛佬主政時八二畫社業務蒸蒸日上，但靜極思動，當佢創作左「江湖大佬」一書之後（都係熱賣之作），於９２年４月牛佬夥拍一眾牛家班弟子毅然離開八二畫社創立浩一有限公司，創業作－「古惑仔」亦都賣個滿堂紅，好快就躍升為江湖書之冠，而哩本漫畫更係創下多項紀錄：（一）最多漫畫角色被改成電影（二）首本漫畫成為電腦上線遊戲嘅藍本（三）呵呵第一本改成三日刊的漫畫。哈哈唔講你唔知我都曾經係９３年頭時做過哩本書嘅駁身架，今天看來與有榮矣，後來成立和平出版公司後更有作多方面創作嘗試哩。