黑豹專欄７９７＃

多產的馮－中華英雄事件塵埃落定之後一切回復正常，大家又回到各自的崗位，老馮雖然與主編中華英雄一職擦身而過，但佢在玉郎機構內並沒閒下來，期間在漫畫王內發表了很多短篇故事如：國父傳、洛奇、亞歷仕五世、劍僮等多部作品，都算是個多產主筆。

八二－而作為漫畫業的中流砥柱，然哥不用煩惱瑣事雜務而專心寫稿，哩段時期的李小龍故事亦發揮得相當精彩而頻頻昇書，意想不到的是然哥居然是第一個離開玉郎機構的人；約滿後然哥得到「同德發行」和「友聲印刷」兩大巨頭支持下，決定出外另起爐灶；當然以黃生與然哥的交情要走絕對無為難，無耐「八二畫社」正式成立啦，事實上當時絕大部份的漫畫人都在玉郎機構打工兼有約在身，黃生並不在意，埋下了往後畫壇百花齊放的種子。

天台怪談－然哥雖然離開玉記但仍然有出席每月嘅義會活動，最重要係有得賭嘛，而嗜賭如命的矇堅雖然唔可以落場，但矇有矇路要賭始終有辦法，當時玉郎分色部設於北角工業大廈頂樓再上－即係天台，有兩個房一個係分色部工作間，另一個就係我地班寫畫仔瞓覺嘅地方，好個矇堅真識得搵架部，居然就係我地休息之地開賭－大細又或是魚蝦蟹，如果撞啱出糧仲會開其沙蟹局問你死未哈哈（好彩無搞埋色情架步）逢係賭錢梗有輸贏，搞到哩間房媽聲四起怨氣沖天，可能因為怨氣多……發生啲恐怖野！

碟中仙－哩間房都算係大伙兒聚腳之地，後生仔喜歡尋幽探勝不知何時興起玩－碟仙，其實當我地仲係海堤街青報工作時曾經流行過一陣，估唔到係哩度又會舊調重彈；當時班友仔都玩得幾癲吓，一放工就聚在公司天台玩個不亦樂乎，碟仙哩家野信與否悉隨尊便，但佢地就玩到好似同碟仙做埋朋友咁，成日問長問短：「你叫乜名呀？男定女？聽日六合彩開乜？我幾時加人工？」（下珊幾仟條問題）比我都覺得好Ｑ煩！「碟仙你點死架？」哩條問題出事嘞，馬上陰風陣陣寒氣逼人，大家即時收口唔敢郁，跟住隻碟竟然玩自轉唔肯回原位，捱到天光至勉強收科；班友哩頭未驚完，但竟然無有識死第晚再嚟玩過，今次碟仙居然答問得井然有序頭頭是道（仲恐怖）最後竟然要求各位幫佢去大嶼山－執骨！嘩嘩嘩！大家你眼望我眼好不容易捱到日出，結論係－丟左張碟仙圖以後不得再玩！呵呵問你怕未！

正氣比利－最搞笑係以後都無人敢上哩間房瞓覺，但有個猛人就當佢係寶嘞；當時有個保安阿頭－大隻拾，佢有個朋友係加拿大返嚟要搵地方操拳準備參加香港搞嘅比賽，黃生見丟空好浪費就比左佢用嚟做健身房，此君昂藏六呎肌肉發達一臉正氣，一入到嚟乜鬼都走晒啦哈哈，無錯哩位正義嘅朋友正正就是加拿大博擊冠軍－周比利；咪睇比利神高神大，專係電影內演歹角惡氣十足，其實好好人心思好細密，對住果位嬌小嘅老婆都不知幾咁溫柔體貼。

又轉第樣－唔知係咪受到比利嘅影響，成班後生仔又喜歡舞拳弄腳，好多時飯後就會係送貨電梯旁攏幾張紙皮就係度玩切嗟功夫，陣容有如開武林大會：老馮的喇嘛拳，牛佬的街頭博擊，李高的西洋拳，哩個又話自己跆拳勁果個又讚自己詠春醒，仲有個恃大隻嘅王堅敏，總之七國咁亂啦，好在哩班生番都算兙制點到即止，無搞出什麼大頭佛（呵呵我當然作壁上觀啦），無幾耐大家又玩厭切嗟哩瓣，真係班善變嘅漫畫人。

堅定流－果陣時玉郎機構已經十分壯大，係北角工業大廈內總共有寫字樓六七層之多，黃生與我地一眾神掌醉拳嘅主筆駁身及御林軍團加馬仔英雄幫都駐紮於廿二樓大本營，仲有間房作為創作部，領軍人物是位才子－蕭若元，還有位笑起嚟個樣幾咸濕－黎彼得，對歷史非常爛熟的－黎偉民，最後入場嘅係佢，一手將漫畫圈帶入戰國時代的他－劉定堅。