黑豹專欄#５　　　拿拿臨

　呵呵，趁上到網拿拿臨貼上第五期嘅黑豹專欄先，呢篇有提到與馬sir認識過程中的小插曲，仲有一些當年快活不知愁滋味嘅點滴情懷......

　　初生之犢──我75年入行做學徒，當時製作分色印刷排版等都並非在同一地方，分到無雷公咁遠，一到發稿時候差不多遠足旅行咁滯，通常由我地班學徒發稿，以老帶新嘅，今日又有條新靚入行，例牌我帶路；當時印刷廠在柴灣，送完稿後經過球場，市政局正在舉行一些演藝表演，有野睇喎？我當然唔會錯過，就同條新靚講：不如睇陣先，遲少少至返公司。新靚：唔好！我面帶三分微笑不怒而威：吞吓pop唔會死嘅。新靚：你再唔走，我返去會話比倫哥知！哎吔？小子竟敢同我對著幹？你好野！怯於他那堅定不二的眼神我只好妥協，返回公司他並無篤我背脊，心諗這個叫馬仔的傢伙尚算夠義氣，午飯後吹水：哦？以前讀者群中馬雲龍就是你？（那時大班讀者投稿，最有印象當然係張萬有啦，水準超高，而馬雲龍也算是其中之一，個名夠氣勢嘛。）話匣子打開後，便開展我倆超過三十年的友誼了。

　　嶄露頭角──76年頭我離開喜報後，只知道馬仔很快就從送稿躍升做景手，無幾耐更開始寫些單格漫畫然後到四格，好快第一套短篇漫畫──小鬼頭面世了，在云云新秀當中表現突出大獲好評，到喜報後期的徙置區風雲，其獨特風格細膩筆觸為馬仔贏得新秀之王的美譽，亦開拓了馬仔通往畫壇高峰的康莊大道；當然還有榮仔亦已躍升為主筆，都創作過不少叫好的作品，無耐老馮、羅君左等新人相繼加入，亦都好快就寫稿。喜報就似個新秀大搖籃，不斷培養出很多極具潛質的主筆，靠著一班年輕小伙子加上然哥的李小龍，喜報在金報和生報的夾擊下仍能迄立不倒；其實76年時漫畫日報確實係風光無限，除以上幾份暢銷嘅之外，資深發行黃光先生也先後出版過以上官玉郎為主打，輔以牛佬呢條靚仔的歡喜週報和光報等，可見當時做漫畫日報都應該幾好賺；無耐漢民也離開喜報加入生報大軍；有蟬過別枝也有回頭是岸；豬師兄由於覺得加入玉郎旗下後卻一直被投閒置散，而然哥亦出言力邀他回巢，就係咁，畫壇形勢起了些微變化嘞。

　　青蔥歲月──兩間出版機構看似水火不容，但私底下我地班靚仔就時有交往，好多時都到對方公司探班聯絡感情嘅，有時會約埋出嚟食吓飯，而週末嘅節目會一齊去上環大笪地shopping；當時我地收入微薄，呢類平民夜總會就至啱我地嘞：有野逛有野食有show睇，買吓衫卡式帶等等，呵呵最精彩係當時正值溫拿狂熱：4吋大關刀裇衫衣領，26吋闊腳喇叭褲，呢d衣著大笪地有得訂造嘞，亦可見我地都幾跟得上潮流哩。講開溫拿，唔講你唔知，原來鬼故大師漢民同阿倫健仔佢地好熟，以前仲一齊夾過band架，個陣時我同漢民唔多熟，但佢過檔後第一件益街坊嘅事就係帶左黃生、三劍俠同我地幾個主筆去探班，當時溫拿樂隊正在灣仔某酒吧拍緊電影（追趕跑跳碰）乍見偶像阿b阿倫，我真個冚身爽死，發燒手震又腳痺（蝦妹共妳歌詞），他們亦很友善與我等閒話家常，只可惜無拍照留念，少少遺憾。

　　汰弱留強──漫畫日報到了76年底時已是決出個優勝劣敗，光報首先打退堂鼓，而喜報靠著李小龍苦苦支撐亦開始亮起紅燈，由於銷情每下愈況，然哥見得個做字萌生退意，無幾耐亦將李小龍抽起準備自己出版嘞；到此喜報只剩下倫哥與馬仔老馮等一班新秀，點撐？喜報摺埋之期不遠矣，而生報這邊卻是人強馬壯如日中天，黃生獨霸漫畫日報市場指日可待，而他亦開始準備染指其他出版嘅範疇嘞；大家懷著不同嘅心情去迎接77年的來臨，呢一年絕對係難忘的一年，我有機會寫打稿嘞，哈哈哈哈哈哈哈哈哈哈！　

　　今日７．１大家有無安排特別節目哩？天氣咁熱，我提議係屋企開大冷氣食個大西瓜煲碟，正呀！