黑豹專欄798＃

　倫哥去向－81年尾黃生一統天下將然哥整個班底收歸旗下，當大家都以為玉郎機構往後日子可以獨步天下之際，然哥率先發難，跟黃生合約滿後馬上出外成立「八二畫社」，雖然並無動搖到玉郎機構內部架構，但已起到牽頭作用，而第二個約滿離開嘅係倫哥。

　倫哥創業－由於漫畫王銷路每下愈況，最後出到第五十多期正式「冚旗」，雖然係咁倫哥仍有得發展，被安排編繪鬼書題材嘅「迷離境界」銷路都ｏｋ，但由於被經理認定為之前馬仔跟公司扭計嘅幕後策劃人，受到冷待就肯定啦，倫哥做到無癮之餘唯有靜待合約完結再另謀發展，83年底倫哥自由了，然後走番去麗城大廈自組「小威出版社」出版同是鬼書題材「迷離世界」（明顯係吸引之前《迷離境界》讀者的手法啦），呵呵倫哥搵啱條路哩本創業作大賣，銷量高達兩萬多本，打破左玉郎一統江山的局面。

　鬼書天下－黃生自然不敢輕敵馬上作出反擊，當時玉郎已經有漢民編繪嘅「怪異集」銷路都好好，黃生一聲令下質素要十倍提昇，更搵來當時玉郎嘅封面大師－陸偉昌製作封面（昌哥係當時玉郎唯一識用噴筆做彩稿之人），「迷離境界」就交比白金龍接手，再加上黃偉釗的「驚心動魄」上官小龍的「鬼怪集」加入戰團，嘩！成個寫畫部真係做鬼（書）多過做人（龍虎門等武打書）；倫哥也不甘示弱，「迷離世界」賣得自然大把水，開始大肆招兵買馬，亦都一口氣推出了「魔幻集」和「香港猛鬼集」，當時仲搵左戴慶賢負責內文彩稿製作，大家都好比心機去搞，務求分簿對方的收益，並爭取最大的市場佔有率。

　鬼打鬼－鬼書大戰一觸即發，嘩當時真係隔日就有新鬼書出版，喺兩大出版社推波助瀾底下，令到鬼書熱潮席捲全港，報攤上鬼書數量肯定多過傳統武打漫畫，當年有部由洪金寶拍嘅電影「鬼打鬼」，用嚟形容當時84年香港嘅漫畫市場真貼切不過；而倫哥亦由麗城大廈搬到斜對面嘅寶新閣，人手太多搞到要租四個單位至容納得晒呵呵，鬼書真係咁掂？

　三支旗－其實早在六、七十年代鬼書亦曾經獨當一面左一段頗長的時間，不少著名嘅漫畫家都曾經編繪過鬼書亦都風行一時（我媽咪當年都好迷架，行街時都會掃番一兩本）哩個情況直到黃生跟然哥出版左《小流氓》和《李小龍》闖出名堂之後，鬼書題材至淪為「二奶」哩，無疑鬼書比起打書更能登堂入室，男女老幼都啱睇，哩個絕對是「它」能夠暢銷的主要因素。而倫哥靠著鬼書的成功，「小威出版社」「玉郎機構」「八二畫社」赫然成為三分天下嘅局面，相信黃生真個始料未及哩。

　合約－其實當年我地一批漫畫仔過檔到玉郎機構都要簽合約嘅，由於幫然哥時候根本未接觸過合約哩家野，所以大家都視之為洪水猛獸，不過公司規矩係咁大家都要接受，當中反應最大係老馮，佢比經理困左喺房幾個鐘頭，聽住經理不斷重複又重複嘅對白，搞到老馮精神紛亂差啲就要拍枱大罵，最後要由黃生親自出馬老馮至肯乖乖簽字，咪以為事件就此告一段落，老馮並唔知道哩單「畸士」已經被經理寫進記事簿內，隨時準備『秋後算帳』嘿嘿！

　奇兵面世－漫畫王釘釘後老馮無左個寫稿地盤甚少出稿，當然有料如老馮喺唔使愁嘅，由於之前跟馬仔合作搞嘅「唐龍」口碑不俗，而當年有兩套電影「魔域奇兵」、「少林小子」非常賣座，於是黃生就夥拍老馮推出類似題材嘅《少林奇兵》雙週刊，主角是個少林小和尚「圓通」加個鬼佬考古教授「鐘斯」，喺12月中旬出街，哩本野掛正黃生個朵自然大受關注，老馮起稿除左「圓通」由黃生勾頭之外其他公仔都由老馮搞掂；咪以為老馮拍住黃生，經理就會和顏悅色，合該行運經理都搵左個「奇兵」返嚟同佢搞左本好好賣嘅「玉郎漫畫」全港熱銷。各位借過－劉定堅嚟啦！