黑豹專欄796＃

前言－在馬仔「漫筆經心」一書內有提到：係籌備中華英雄單行本之前，公司派左個job比佢，以已故巨星李小龍為題材的一部短篇－「唐龍」，公司計劃以哩部漫畫進軍日本市場；當時馬仔欣然接受，而我記憶所及哩本漫畫好似只出了一期，上半部由馬仔開筆，然後由老馮接手；漫畫行內以老馮嘅畫風最近似馬仔，所以今次二人嘅配搭絕對深慶得人啦，而出嚟嘅效果亦都相當令人滿意，但無諗到兩師兄弟嘅合作仲會有下文……

放縱的馬－完成左哩次任務馬仔全力去做中華英雄，單行本一出就賣個滿堂紅，照道理馬仔應該係好開心啦，但原來太快成功反而令馬仔陷入左個困局－「大腦便秘症」，一心追求完美的他每日瞓醒就係去諗點樣做得更好，人物場景故事無一瓣唔諗到頭爆；我地作為讀者只知道每期去報攤買書追看，絲毫感覺唔到個作者舉筆維艱之苦，無計可施之下馬仔唯有玩吓放縱失蹤幾日啦，如斯大事當然震驚整個寫畫部，大家議論紛紛眾說紛云，當馬仔鳥倦知還一返工當晚就比經理「的」入房「照肺」；我不在現場當然唔知經理講乜，但經理嘅「悶蛋心法」非常利害，滔滔不絕一講就幾個鐘……

（悶蛋心法要訣－不斷將某件事情重複又重複又重複係咁講，直到對方精神絮亂失晒方寸就可以為所欲為，實為行走江湖講數時最歹毒招數之一），我諗當時馬仔本來大好嘅心情一下子跌到落谷底（呵欠），可能經理見馬仔開始眼瞓就攞張新合約出嚟，博馬仔不知就裡胡里胡塗底下－成功簽定新約。當然馬仔不會輕易就範，清醒過後硬要將合約內容了解清楚才肯動筆，最後更是拍枱走人；頂撞經理喎氣氛當然不會融洽啦，事件疆持不下而公司早有兩手準備，正選唔上場仲有後補，正是他－老馮。

被屈的馮－馬仔唔肯就範簽約即急召老馮回公司入經理房，老馮雖然習武多年拳腳了得但內功麻麻，敵不過經理數小時嘅「悶蛋心法」，要步出經理房門只好乖乖屈服－簽約續寫中華英雄；脫身後老馮懊惱不已，立即將此事告知馬仔，更約埋榮仔出嚟三人互吐苦水，呻完一大輪後就各自回家，既成事實反而令馬仔釋懷內心舒坦，壓力頓然一掃而空，仲享受左個不用趕稿的新年假期哩（當年我跟馬仔少傑幾pair去左中山玩哩，呵呵）。

放完假後－馬仔想起跟公司仲有六年舊合約而頭痕之際，一個在公司內的前輩打電話來：「馬仔，黃生想約你見面！」事件又再次峰迴路轉；哩位前輩就是上官小威－倫哥，記得當時倫哥有房坐，我地好多時會入佢間房吞pop吹水，馬仔都唔例外；以經理嘅智慧當然認定倫哥就係馬仔背後出謀獻計跟公司對著干之人，要搵到馬仔當然搵倫哥出馬啦，就係咁馬仔得以跟老闆直接對話，當然好多合約上嘅問題都能迎刃而解啦，最後一個問題－稿費，由於雙方有著頗大分歧，而可能馬仔醒起跟矇堅嘅賭約，實行同黃生「賭－鑊－金」；呵呵個結果你咪理，總之中華英雄能夠復刊，最大贏家當然係廣大讀者們啦，停刊兩個多月後讀者手上又有番果種感覺－英雄在手，天下我有！書內嘅「馬仔手記」當然堂而皇之說什麼提昇質素如何如何，實情係：馬仔賭左人生第一鋪－大嘅。

後記－哩件事雖然完滿解決，但當時大伙都意識到公司嘅立場，仲敢埋馬仔身邊咩，所以矇堅爽約絕對可以原諒；而好大程度可能已經影響到倫哥在公司嘅地位，隨著漫畫王銷路每下愈況，倫哥開始無房坐要搬返出嚟，然後就越搬越差最後係搬到洗手間旁邊，徒嘆奈何！