黑豹專欄＃７９４

　潮起潮伏－漫畫王可以說是倫哥金漫畫的延續，只是由馬仔老馮榮仔等新晉主筆担綱演出變為更多元化的群星供照，由黃生領軍的「小魔神」令人期待，加上老馮的「劍僮」興豬的「青山」（惡搞電影蜀山）本黑人的「銀河反斗星」還有其他不同風格主筆的趣味小品，應該無人質疑它的銷情，創刊號賣個滿堂紅是意料中事，所以果幾圍慶功宴－預左啦。正當好奇經理準備插手參與倫哥漫畫王的創作事務時噩耗來了，漫畫王銷路在第三期開始急遽下滑，哩本綜合性漫畫馬上成為燙手山芋無人敢碰，好奇經理馬上使出變臉招式跟倫哥劃清界線作其壁上客，好快倫哥就感受到人情冷暖慨嘆不已，但漫畫王的稿仍要繼續寫，只是由極度器重淪落為無人問津，黃生的小魔神也草草收場，變為我等三流主筆賣稿之地也算時也命也。

　神掌面世－當時市面上九成九漫畫都係玉郎出品，最賣得當然係龍虎門啦，李小龍壽星仔都係熱賣，醉拳８１年面世後來由萬有接手續寫成績都非常好，８２年黃生第三部作品－如來神掌亦都強勢出版嘞，照辦煮碗黃生先攪好創刊號，當晚馬上就急召牛佬翌日返工接手續寫咯，速度之快都算破紀錄；如來神掌最初的發展以「天彿掌」作為藍本，男主角龍仁出場無耐就瓜左，由佢個遺腹子龍天開始新故事，但無耐都「香」埋，正式成為主角係其子龍劍飛，係漫畫史上從沒有過的鋪排，故事情節方面亦由「天彿掌」過渡到「倚天屠龍記」，只見牛佬攞住本小說係咁參考（當時醉拳故事亦都係參考「射鵰英雄傳」），金庸嘅小說何等情節豐富人物與故事絲絲入扣，所以哩兩本漫畫都好好睇，賣得不在話下啦。

　駁身生涯－由於漫畫王唔賣得，大家都無興趣寫稿在哩度登出，版位相對多左，倫哥亦好關照叫我寫黃生以前另一暢銷作品－小傻仙，呵呵好咯起碼「呃」番啲稿費穩定生活，由我起稿然後由黃生親自勾頭我再駁身，都出左幾期架；斯時然哥都係在十三樓一齊工作，可能佢見黃生搵人駁身做得夠「他條」，於是又叫我試吓，試左兩期效果都唔錯，而當時如來神掌發展到光明頂一役人物眾多，之前係由牛佬起稿兼駁埋身，嘩幾佰人圍攻光明頂淨起稿都起到手軟，終於頂唔住要搵人幫手，可能佢見我幫李小龍駁身啲公仔見得吓人，就推荐我比黃生，黃生二話不說就搵然哥傾偈（都算係挖角啩），就係咁正式開展我駁身生涯嘞，當時稿費係每期五佰大洋，即係每個月二仟元，就８２年嘅生活指數算係不俗啦。

　做義會－當時玉郎機構人才濟濟，黃生如何維繫與眾多主筆溝通都算一大課題，哈又比黃生諗到發起「義會」運動，公司所有主筆、高級助理或行政人員一律被邀請參與；如果你唔知係乜傢伙且聽我道來－義會係以前舊社會一種聯誼方式，形式同存錢入銀行差不多，發起人做「會頭」（當然要具備相當財力）有個出標價，通常係會銀嘅十份一，以當時黃生攪嘅係五舊水一份，標價即係五十元，到時邊個等錢駛就會出標價高者得，標完以後就要供死會，以當時約三十人計一次過可以攞到萬幾蚊都相當過癮架；有黃生做會頭大家都唔驚會有人走路絕對做得過，最重要係名正言順可以每個月嚟一次飯局，等黃生有時間同眾人聯絡感情兼玩番晚一舉兩得；飯前通常有賭局可以打吓麻雀仔，重頭戲當然係沙蟹局啦；由於賭得幾大吓，落得場通常都係啲老細或部門巨頭，即係黃生然哥黃光牛佬等人，我哩亭搵幾仟嘅基本上只可以做觀眾，而當中卻冒出一個賭壇怪傑喎，此人其貌不揚個子細粒搵得個７、八仟，居然夠胆坐落去？何許人也？正正係以後影響畫壇多年的他－矇眼佬是也！

　絕活的矇－認識矇眼佬應該係喜報時代，最初對佢有印象當然係佢嘅高度同埋過仟度近視啦，當然佢包拗頸嘅性格都惹來不少口碑；呵呵最記得有次去派對佢西裝一度到場，發現佢突然高左？原來闊腳褲下係對五吋高踭鞋，嘩使唔使呀？而佢邊跳舞邊跟住唱個「冧」樣都帶比我地不少歡樂架，哈哈！但……賭桌上的他卻絕對是個風雲人物哩！