黑豹專欄７９２＃

醉拳來由－分析吓81年11月前漫畫行的形勢，絕對可以用風起雲湧來概括形容；黃生雙塔－金報、生報繼續在漫畫日報市場領跑，龍虎門一如既往極度賣得，而由於電影醉拳在東南亞大收旺場，醉拳漫畫亦都應運而生，先在生報連載再結集成書推出市場，當然熱賣啦，穩佔前三位置；開頭係由黃生親自編繪，畫了半年後就由萬有接手做圈稿，黃生勾面相李高駁身，變相多左本黃生嘅作品啦（之前萬有幫黃生做實景嘅，有景王之稱號，後來昇格為主筆，作品有龍虎門新傳及野狼傳，成績強差人意，執筆醉拳絕對係揚眉吐氣之作，而當時哩套作品基本上係以射鵰英雄傳作藍本，所以各路人物有熟口熟面之虞。）

英雄乍現－馬仔自從80年2月被黃光炒左之後就過檔新浪潮發表了兩套輕鬆短篇，無幾耐新浪潮亦都「拉閘」玩完，馬仔攞住套沒完成嘅風流續篇－金臂小子，經友人安排下就去見黃生嘞，雙方一拍即合，中華英雄就此橫空面世；當時在生報連載每日一大版，對馬仔嚟講工作量急昇十倍，莫講話無時間同我地去威，連屙臭臭都唔得閒啦哈哈；中華英雄推出不久已贏盡口碑迴響不絕，及後在醉拳一書中連載銷路更是節節上昇，當時我地坊間有個疑問，到底哩本書熱賣係醉拳本身定因為連載左中華英雄呢？當然答案好快會揭曉。

楚漢梟雄－講返我地經過黃光嘅一輪蹂躪之後，到左81年中時改名連環圖日報再戰江湖，論實力跟金報、生報仍有段距離，但眼見馬仔埋頭苦幹下成績突飛猛進，大家心中個團火亳無疑問燒到『興恰恰』啦，博盡係唯一嘅態度，實力有限但大家戰意高昂；可惜事與願違，日報成績只是一般，當時李小龍一書仍是熱賣，但日報銷情只能夠維持開支，私底下我地並不氣餒，一班年青人有足夠戰意去打哩場漫長的仗，有如楚漢相爭務必戰至一兵一卒為止，何其慘烈啊！

俠義馮風－就在我地班年輕楚軍躊躇滿志之際，11月中旬的一個晚上，項羽（然哥）忽然大宴群臣，席間透露左個曠古燦今嘅驚天信息，內容係：「我已經將個江山（日報）賣左比劉邦（黃生），由聽日開始我跟大家一樣都係打工，唔願意留低嘅可以選擇離開，留低嘅待遇照舊！」太晴天霹靂啦！點解楚漢相爭嘅故事會發展成咁？去烏江自刎嘅應該係我地哩班將士喎，大家都有啲被賣豬仔嘅感覺，而倫哥淡然一句：「都係打工啫！」明白到現實嘅殘酷，大家亦只好無奈接受，看到豬師兄神態自若，再冷眼一看性格火烈的老馮，他並無我想像般的不忿咆哮，他只是回到家中在其案頭日記上寫上一句：「我明天要為我的敵人工作！」噢！多麼武俠啊！一夜翻天後連環圖一統天下嘅日子來臨嘞，九成以上嘅漫畫精英都係黃生手下，當然哩個只係黃生宏圖大計嘅起點，連環圖往後嘅發展更是令人驚嘆呢。

釋我疑團－最近看過無線電視台的節目－香港獨家，一個纏繞多年嘅疑問終於有了答案，當日黃生是如何打動然哥將盤生意拱手相讓哩？都係錢作怪啫！但黃生出手之豪也教我等夠大開眼界矣（然哥『李小龍』一年稿費最多只賺佰幾萬，黃生一出手就二佰萬，點推？呵呵）。過兩日我等就由海堤街搬到北角工業大廈十三樓，當時全香港至top嘅漫畫人聚首一堂係哩度開工，氣氛相當熱鬧，我跟馬仔老馮等能再度共事當然開心，但最興奮應該係黃生－係黃興豬先生，因為佢準備做「老襯」嘞，師兄辦喜事師弟當然要出馬相助啦哈哈。

本段又完啦！