黑豹專欄７９１＃

白銀黃金－從1975年11月正式入行到1980年2月整整5年光景，從小學徒到主筆，由喜報到金漫畫再到青報，馬仔度過了一段叫好不叫座的「白銀」歲月，黃光接手青報後把幾個包括馬仔在內的新晉主筆栽走，沮喪只出現在馬仔接到通知的一剎那，他並無太大的憤怒，當時馬仔有幫【新浪潮】一書寫啲散稿，生活暫時還可以，只是換個出版社而已；于是稿仍是努力去寫，拖仍是甜蜜地拍，ｐ仍是偶爾地參與，在新浪潮曾發表過「老差骨」，「醉拳」等輕鬆小品，有口皆碑，只可惜新浪潮最後仍逃不過「摺」的命運。放心，哩次只是馬仔正式步向他「黃金」年代的起點啫。

老馮回歸－栽員行動後大家士氣開始低落，而黃光接手青報一年後仍未能轉虧為盈，開始心淡想打退堂鼓，當時李小龍一書在市場仍是熱賣，然哥當然唔忿「巢」，決定跟黃光合股將青報重組實行大革新，先找來倫哥加盟，重召在外浪蕩近一年的老馮回歸（老馮同恆仔離開青報後改行去學油畫，做左大半年發展麻麻，但又比佢學到啲漫畫以外嘅技巧，對著色有了深層次嘅認識，獲益良多；期間仲走去無線電視台客串臨記，大家想一睹老馮小銀幕上的風采？搵套叫「千王群英會」的電視劇，尾二個集在九宵樓屠四海火併仇大千，留意吓啲圍觀者睇吓見到老馮無？呵呵），執筆由榕叔度橋的鐵漢神龍，而豬師兄就寫醉猴拳，加上一班新紮師兄弟如我和麟仔等，再改名【連環圖日報】，煥然一新再戰江湖，8月2日正式出版嘞，最特別嘅隨報附送一本特刊，由然哥牽頭加上倫哥、榕叔我地等抒發啲繆論，哈又幾有創意喎，哩本特刊好似連續出左10期，登啲封面比大家睇睇。

維園黑人－哩段時間去ｐ漸漸式微，代之而起是另一種玩意－踩撈乸（滾軸溜冰），又係由恆仔引入，個時佢帶左對鐵輪滾軸鞋返嚟新廠，我地一試之後大呼過癮個個趨之若鶩，行動最實際，我同老馮訂造左對纖維輪滾軸鞋，成四舊水架，跟手加入左維記公園一隊叫影子的溜冰隊伍，哩隊野以速度見稱（另外兩三隊以玩花式為主）每逢喜慶時節我地都會出嚟表演娛樂大家，如果您當年都有去過維記睇哩類表演，可能您都曾經成為過我的觀眾呢。

又講拍戲－滾軸溜冰是個不錯的運動，亦因為咁我同老馮又有機會上大銀幕；一套由麥當傑導演文雋監製的校園青春電影－「俏皮女學生」，主角係溫碧霞麥德和，搵左我地一大班滾軸友去九龍灣德福花園內的溜冰場拍左幾日，期間仲差點跟文雋嗌交呢，諗返都好笑；原來通貨澎脹並沒來臨，做茄哩啡仍然係$30一日，我好彩啲有機會做特約，即係比茄哩啡高一個檔次，有動作或者對白；哩套電影勁抽好多，成龍洪金寶元彪主演－「奇謀妙計五福星」，有場戲講成龍去參加滾軸溜冰比賽，跟住佢出場後面著套白色運動服果個就係本黑人嘞，呵呵；

成龍大哥好nice，未埋位前好中意講佢拍電影嘅經歷比我地聽，口沬橫飛好不過癮；最有印象係成龍同洪金寶收工後邊個做東慰勞班手足，他倆只是猜拳來決定，真豪邁，看在眼裡我問自己幾時可以變得咁豪呢？做特約$200一日，拍左五日收成仟蚊，比起我寫稿高好多，而馬仔80年9月已開始繪畫中華英雄在生報連載，老馮回歸漫畫行後亦有不俗發展，對比我哩個只懂吃喝玩樂無心工作的黑傢伙，呵呵三人行必有我「屎」矣。

八級地震－連環圖日報出版了約三個月，銷情一般，並未達到然哥預期的成績，正是進退唯谷之際，一個石破天驚的收購行動已然開展，我地一班人被安排上了貨架哩，哈哈