黑豹專欄７８４＃

　　　　　　　　　　　　　　　　　　　　　　　　　　　　　　　　　　東山再起──然哥與黃生這對畫壇上的歡喜冤家，不斷上演著你追我逐的遊戲，黃生也認同有段時間然哥是非常接近的，至少在銷路上反映如此狀況（四萬書對五萬書），打從1975年開始轉為日報方式面世以後，然哥仍是扮演著追趕的角色，由歡樂週報到喜報然後是東報，然哥仍然是敗仗連場，似乎漫畫日報的大哥地位已是黃生的囊中物，還好然哥的「不忿巢」性格又再為這個一面倒的漫畫日報市場帶來一片新景象。

青報──時為1978年，直度薄裝漫畫最好銷量的金漫畫，有馬仔五兄弟掛頭牌都只是區區五仟多書數，正在慘淡經營中；而我和阿添的金香港漫畫和殺手小閻皇，更只得仟零書數根本無得做，正是坐困愁城之際，救星到。一個下午接到然哥的來電，開宗明義話要再攪一份漫畫日報，想搵我地一team人幫手，我地當然一口答應，前提係希望然哥收購我地公司嘅股份，然哥好大方比左一筆錢我地，正式過檔嘞，記得當時我一版稿費為$70，附送德仔信箱一欄不另收費；除左我地然哥更將馬仔、老馮、榮仔等精英招攬過來，當然條件更是優厚，每人比左一筆錢做押金，稿費亦都從優，連埋豬師兄同埋以前東報既有嘅班底都算係人強馬壯，就係咁青報準備面世嘞。

真係咁喬──黃生同然哥真係好鬼有緣，唔講你唔知佢地連住嘅地方都要係埋同一座大廈嘅；無錯，就係當時鰂魚涌區嘅豪宅──金舫大廈，好在兩位係住雙單號樓層，果時豪宅係分開雙單號嘅電梯，應該好少機會撞到，唔係？係電梯內打交都似，哈哈。當時人手急速澎脹，然哥就在鰂魚涌龍景大廈隔離座永順工業大廈（已經折左起過）做製作部，我地好快就由龍景大廈搬左入去開工；然哥再租左同區麗城大廈（又係已經折左起過）一個單位做分色部，然哥仲教識鄺太做分色工作，佢成日都笑住話分色部係全間公司最穩陣嘅部門，無人撬得郁，除非連佢老婆都搶埋哈哈，無幾耐青報正式出版嘞。

派對──認識馬仔、老馮兩三年，在最初時同馬仔做過兩三個月嘅同事，老馮就直情未工作過，之後都係間中出嚟玩，去游水旅行等健康節目至會碰面，現在正式一齊做野，都算係緣份；當時馬仔佢地三個都各自係自己屋企開工，我就貪熱鬧鍾意留在公司瞓，一張摺床朝行晚折，有時幾個同事瞓唔著又會買啤酒瞓在紙堆上面吹水到天光，生活都相當寫意。最開心就一定係月頭出糧時，因為當時一定最人齊，馬仔、老馮等會攞住當月嘅稿件過嚟出稿費，大家就會把握時間互相問候吓；其實平時我地都有見面嘅，旅行係其中一樣活動，自從呢套電影上映後我地就多左一樣活動──去p（派對之謂也）。

舞王馬──1978年週末狂熱呢套電影席捲全球，男主角尊特拉華達憑著一身精湛舞技成為年輕人嘅偶像，我地班寫畫仔也不例外紛紛仿傚，就係咁愛上左跳舞呢種活動嘞。咁我地班寫畫仔當中邊個跳得最叻？無錯又係佢──馬仔。呵呵咪睇依家嘅馬sir成熟穩重斯文有禮談吐大方，當年都算係型仔一名架，當年馬仔其實係個跳跳紮幾活躍嘅年青人，身型偏瘦的他彈跳力十足骨架柔軟，跳舞動作卻又熱情澎湃，動感美感俱備；而佢跳舞同寫稿一樣投入，往往在家中苦練一些新舞步，然後在相關場合「晒冷」，總要令人有意外驚喜嘅；以下我輩給與他的稱號就可代表一切──「舞王馬」利害哩。我記得最初時我地係去佐敦柯士甸路某間的士高玩嘅（已執笠）無幾耐一些樓上派對如雨後春筍般開到成行成市，依家四條以上嘅香港人應該都記得：當年在旺角先施百貨公司門口等住去p嘅墟憾場面啩？呵呵。