黑豹專欄７８３＃

 　前言──77年香港報攤大部份賣嘅公仔書都係橫度，都係在漫畫日報連載後再結集成書出售，為數不多的直版公仔書中最勁當然係上官小威加馬仔老馮榮仔嘅金漫畫，當中馬仔嘅五兄弟更係技驚四座獨樹一幟嘅超強勁作品；而現實中都有五兄弟「五條傻仔」，幫某出版機構做完廉價勞工之後仲要鬧上勞工署，坐困愁城之餘眼見金漫畫有市場見獵心喜，「五條傻仔」又話要自資出版嘞。

　合股攪書──77年尾我地大伙兒比多報「跣」左鑊之後，無工開賦閒在家，一日徐木添來電話有新攪作：大家對漫畫嘅運作相當熟悉，不如自己攪啦！原來大家都好有興趣，於是提出用股份制，分7份夾萬四蚊，我和徐木添每人四仟，陳家亮尚青雲余耀南每人二仟，柴娃娃攪出版嘞。我記得當時我老爸退左休，我又無乜收入莫水，硬著頭皮寫左封信比我一個在英國做餐館的舅父度水，呢個舅父不嬲都好錫我，二話不說就寄左幾佰磅比我，呵呵有本錢埋班咯，78年頭五條傻仔就成立左間出版社，辦公室設係鰂魚涌海堤街龍景大廈某單位，當時仲拉攏兩名高手羅君左與廖瑞賢（筆名黃鷹君）客串，兩本創業作：一本擺明抄襲金漫畫嘅綜合性漫畫「金香港漫畫」（共六期）另一本就係小弟掛頭牌嘅「殺手小閻皇」（共四期）期數咁少當然有原因啦，人手有限出得好慢，有稿啫仲要搵發行同印刷。

　晴天霹靂──當時發公仔書嘅唔多，得兩間──吳興記與保光發行，都係大公司發慣大書；阿添認定佢地唔會做我地生意，唯有自己去搵新嘅發行，搵呀搵結果係旺角上海街搵到間叫豪生出版社，老闆姓陳六十來歲，話可以幫我地發書兼介紹埋印刷比我地，折頭同印刷價都ok，萬事俱備於是78年初兩本創業作就推出市場啦，每本盛惠八角（當時金漫畫賣緊一蚊本）由於我在生報多報都寫過稿，阿添又打正黃生得意弟子嘅牌頭，又平過人地，我地估呢兩本漫畫應該可以站穩陣腳，創刊號出版後坊間反應都唔錯，每日都收到十封八封信，正當我地放下心頭大石之際，發行老陳來電話兩本書反應奇差完全無銷路，唔係呀化？連續三期發行老陳都話好差，點睇都無可能一仟都賣唔到啩？當時我地有個陰謀論：印刷同發行都係老陳攪，當中會否有古惑呢？（呵呵當時行內流傳一個笑話，話我地印八仟回八仟幾，哈哈當然係無可能，但賣得幾佰就真係心到實晒，真係連印刷費都唔夠找呀陰功，唉！）

　柳暗花明──正當我在家中寫緊第四期小閻皇嘅稿時，老爸見我愁眉不展多口問起，我和盤托出後，老爸出示一張名片：我有個老友好似做緊發行嘅，睇吓幫到你無？我接過名片：同德書報社？老爸：呢位球叔以前同我好好朋友，我幫你約佢啦！當時由於對豪生老陳無晒信心，只好放手一試啦；過兩日同埋阿添就登門拜訪球叔，由於球叔貴人事忙，我地就跟佢位女婿鄭生見面（即係依家穩執漫畫發行牛耳嘅同德鄭老闆），當年同德係發行多本暢銷刊物如：香港電視、姊姊雜誌、新時代雜誌等等，已經係發行界嘅大佬，但就從未發行過漫畫；鄭生淡然講句：試吓無妨！阿添知道同德猛料當然唯唯是諾，第四期終於改由同德發行嘞；當然換個發行並未能起死回生，銷情稍好亦只是多了仟書之數，終於明白到其實自身嘅實力都係好有限，未夠班攪出版。

　救星到──收回第四期嘅回書之後我地幾個股東開會，由於資金已去得八八九九，仲能否繼續撐落去呢？大家都有點意興闌珊，同馬仔老馮電聯，佢地都同樣面對銷情下滑嘅問題，莫非漫畫市場只能由黃生嘅漫畫日報獨大？（其時然哥嘅東報銷售不佳已然結束）唉！這天如常回到公司發呆，但直覺告訴我今日會有特別事發生，果然電話鈴聲大作：喂邊位？然哥？