沙巴2008-day1~day4

七日既沙巴之旅, 上山下海又入紅樹林, 行程相當豐富
基本上第一日同第七日都冇咩行程, 因為係午機去, 早機返~

先講我覺得非常抵既機票, 亞洲航空深圳機場來回沙巴, 雖然時間差少少, 深圳13:15起飛, 沙巴返就早上9:30,  但價錢連稅都唔洗HK$1,200.......真係抵~  話就話冇野飲冇野食o者, 但係可以俾錢買, 仲要係茶餐廳既價錢, 味道仲唔錯添~ 呀, 仲有係冇得劃位, 先上機先揀位


2個幾鐘頭機好快就到, 沙巴機場唔大, 就咁行去入境大堂


入境超慢, 攪掂即飛去酒店 Sutera Harbour - Magellan, 的士機場去市區公價 馬來西亞紙RM$20 (RM$1=HK$2.6)

酒店好近市區, 由於係 resort 形式, 環境非常正, 計埋稅同服務費都係 ~HK$1100/晚
房入面既露台


景觀幾好~


就酒店海邊花園望日落, 好舒服呀~~~~~


睇完靚靚日落我地就出去食晚飯, 第一餐食海鮮, 去了 PORTVIEW 既不夜天海鮮城
蝦, 軟殼蟹, 鮑魚, 東星斑, 大司庵, 沙白, 碗仔翅......每人約 RM100, 味道都幾好, 起碼新鮮, 最特別係食大司庵, 真係拳頭咁大, 一打開.......好似成堆血水流出黎咁, 好血腥  XD

本來食完諗住行下街, 點知忽然落大雨, 輾轉去左酒吧飲野
飲完都係好大雨.....返歸好了

DAY2
第2朝一早去問 DAY TOUR, 報了即日下午去紅樹林睇長鼻猴同螢火蟲 (RM195/人)
下晝先出發, 上晝就o係 resort 行下, 游下水, 呢幅撻落水既相影得都唔係好肥o者  XD




呢個活動由下午兩點至晚上十點, 包TEA, DINNER, 同酒店接送
坐2個鐘車去到郊區, 上左架船仔先去食 TEA, 之後就沿住一條好闊既河(黃泥水)搵野睇, 一有野睇, 佢地就會停低指住叫我地睇
呢隻就係長鼻猴喇~  個樣好鬼 CUTE, 但如果唔係用長鏡影佢地, 跟本望唔到佢地個樣, 好鬼遠架


嘿........大家見唔見到佢地既生理狀態, 導遊話佢地係長期保持住架  XD


睇左一個鐘, 有 BONUS, 彩虹呀~~~


睇到黃昏就去食一個簡單既晚餐, 跟住黑晒天就開船返去, 回程就會見到好多螢火蟲一閃一閃o係河邊既紅樹林入面, 佢地都會飛出黎, 可以捉住放o係手入面, 好正, 好靚, 好難忘~ (不過太黑.......影唔到相 XDDD)

返到酒店好夜, 叫導遊車我我地去食肉骨茶, 味道都幾好, 不過只可以當小食, 如果當正餐就好似唔係咁恰當

食完都冇野行, 返酒店了

DAY3
今日係去玩 PADAS RIVER 激流 (RM 200), 8點出發, 好眼訓  ZZZZ
首先要坐 2個鐘車去一個火車站, 再坐約半個鐘火車去河既上流, 我地就係咁坐O係露天既貨卡上面, 感覺好爽~



由於冇得帶大機, 細機又影完幾幅相後壞左......冇激流相睇  XD
冇相都唔緊要啦, 呢個激流好好玩, 大約玩3個鐘, 有 4-5個大浪位, 基本上都唔會有危險, 跟足導遊指示就可以了, 因為要自己扒既關係, 玩完都幾攰架, 值得一玩~

玩完返到酒店都7點幾, 放低野又出去搵食了, 今次去了一個大 food court 搵食(裡面有間叫"雙天" 食海鮮比較出名), 我地冇食海鮮, 只係叫了 d 小食, 3碟炒粉麵食味, 味道不過不失啦, 勝在夠平 XDD 試左杯好多人話正既青檸冰, 好好飲, 食完就行去隔離 Night market 望望, 有少少手信類既檔口, 都可以望望既, 但特登去就唔值得了


DAY4
黎沙巴, 好多人都一定會玩潛水, 我地呢日上晝都出左去 MAMUTIK 島玩下浮潛, 降傘....等等, 本來好似烏天暗地, 好彩最後都見到陽光, 浮潛都唔錯丫, 好近岸都有好多珊瑚同魚睇, 識合怕危險人士  XD


嘩, 你睇下碼頭幾多魚就知啦


走時好好天, 睇下, 望唔望到遠處既神山~


朋友俾水母炸親, 救生員幫手處理中, 攪到個個都唔敢落水  XDDDD 我唔理咁多, 繼續潛~~~~~  朋友話好痛呀, 唔知而家仲有冇疤呢??


HEA 下 HEA 下, 坐一點鐘船返酒店, 好快梳洗完就要 CHECK OUT喇~ 因為今晚就要過神山山腳既酒店喇

去神山前, 又行下市中心先........先去搵海南雞飯食, 冇咩特別.......黎到咪試下囉, 三角嘜飯  XD


食完又去行街喇, 去左 手工藝市場(就係 PORTVIEW位置), 好多T-SHIRT (RM8-20), 好多手工藝品, 呢個我覺得好值得行下, 買下野俾自己留念, 又買下手信俾人真係唔錯架, 後面就係菲律賓市場, 有好多小食 (不過見到好多FLY.....唔敢食)


行到6點就返酒店坐車去神山喇, 司機仲車左我地去食地道馬來西亞菜, 好好味呀~

以上就係我沙巴既前半部分 (輕鬆), 後半就係艱苦既行程.......上神山~
先賣個關子, 我地會由 1829m 高既發電站出發, 先行到 3344m 既 Panar Laban 休息, 半夜再攻頂上 4095.2m 東南亞第一高峰~~~ 而家諗返都覺得.......好辛苦呀~~~  XD