2009 聖誕 埃塞俄比亞之旅 - 簡介

好忙呀好忙呀, 調了職真係乜時間都冇晒, 日日都做到死咁, 返到屋企都冇心機寫blog. 拖了成個幾月, 決定唔可以再咁懶了, 否則到失憶時想寫都冇野寫

一般資料

國家: 埃塞俄比亞 Ethiopia

首都: 阿的斯阿貝巴 Addis Ababa

簽証: 特區護照可在機場做落地簽証, 費用USD20. 大約只要二十分鐘就順利入境.

語言: 大部份人懂英文

宗教: 東正天主教

貨幣: 12 Birr = 1 USD

只有首都的少部份酒店接受信用咭, 而且還會加 surcharge.

氣溫 : 12月時大約 5-20 度左右

國際交通

首選當然坐埃塞俄比亞航空由香港經曼谷 (唔駛落機) 飛 Addis Ababa 最慳時間, 隔天有機. 直至在我出發時, 埃航飛行記錄極好, 沒有重大事故發生. 不過剛剛就有一架機在貝魯特起飛失敗的空難, 諗起都有o的驚. 

飛機是波音767, 座位算舒服, 不過就衛生清況普通, 唔知係咪心理作用, 成日覺得好似周身痕有蚤咬咁.

出乎意料之外飛機餐係好好食, 咖喱雞有茶餐廳水準. 不過太好味唔記得影相.

唔想坐非洲既航空公司, 可以坐阿聯酋航空 Emirate, 不過票價較貴, 而且回程時轉機時間極差, 要在杜拜停留半日.

內陸交通

道路網剛開始建造, 現在只有極少部份城之市間有柏油路. 大部份道路都是沙麈滾滾, 車速最快只可以行 30-40km/h, 所以大部份遊客都會坐內陸機. 二十分鐘既機程就可以免除十幾小時的車程, 機票也只是二三百港元. 內陸機只有埃塞俄比亞航空一家, 沒有其他選擇, 如飛香港那一程是坐埃航, 買內陸機票有折.

Bahar Dar - Gondar 的公路剛建成, 可以坐公車 2.5小時往來兩個城市.

市內交通

在首都Addis Ababa 機場坐的士出市中心, 價錢大約 70-100 Birr. 和所有落後地方一樣, 機場出市區既價錢都是比平常貴幾倍.

大多數城市都有這些東南亞國家常見既tuk tuk, 當地人坐就0.5 Birr, 但遊客就一定被佢地大斬, 10-15 Birr 一程閒閒地, 睇你既講價能力.

簡介

埃國剛剛開始發展交通網絡, 中國在當地協助興建道路, 沿路都會見到好多中國製的大型運輸車, 起重機, 及中國既工程師等等. 所以中國人在當地幾受專重, 當然中國遊客也是佢地心目中的水魚.

由於當地人好窮, 遊客就是最好討錢的目標。無論去到那裡都有好多乞丐，小朋友等等死跟問拎錢。四周不時有「熱心人仕」好主動積極咁去幫遊客帶路或做guide，當然最終都係想拎tips。總之無論任何人行近都say no, 又或者咋聽唔到, 就係最好既方法避免破財。當地既小朋友知道直接問攞錢，遊客多數會拒絕，於是進化到問你有冇筆，好似可以幫到佢地讀書咁。當然佢地收到你既筆係唔會拎去做功課，而係拎去賣換錢。

基本上無論去到邊，你遇到乜人，總之佢幫你做了少少野，佢就會問你拎tips。導遊，司機，船伕，酒店拎行李服務生，教堂內既長老，牧師.... 仲有就係被你攝入鏡既人... 記住身上一定要帶備足夠既零錢比tips。

不過雖然係窮國及好多好多乞丐，但佢地唔會夾硬去偷去搶，治安在Africa來講算係相當不錯。晩上十點在街上行也不覺危險，當然不要單獨外出啦。

另外特別要留要就係時間，當地人講時間係講埃國時間，比正常時間慢六小時的。所以如果要約車約導遊, 記住講清楚是 Ethiopian time 定係 European time.

食物

咖啡是埃塞俄比亞的經濟命脈, 大部份出口的外匯收入都是靠咖啡豆.  埃國是咖啡的發原地, 而且相傳 Coffee 這一個字是由埃國發現咖啡豆的地方 Kafa 演變而成的. 來到埃國一定要飲咖啡, 真係非常平及好飲, 咖啡香到不得了.

在埃國飲咖啡是要花一點時間等, 這裡沒有美式快速的高壓咖啡機, 只有用手即磨即煲既咖啡. 在遊客出沒的地方隨時都會見到 Coffee Ceremony. 這是埃國傳統飲咖啡的儀式, 穿民放服的主持人會先燒青草來淨化空氣, 作用是來refresh你既嗅覺. 跟著就點起炭爐, 白煙包圍了附近的地方. 主持人把生的咖啡豆放入平底鑊再放上炭爐上炒熟, 咖啡香氣就散佈每一角落. 炒熟了的咖啡豆就放入一容器內用人手搗碎, 再把"咖啡粉"倒入一個長頸的壼內加水煮熱, 然後就倒進一個類似拜神用既小杯內奉上. 

Injera 通常會跟一碗叫wat既醬汁, 內裡是一些羊肉或雞肉碎, 味濃帶點辣. 食法好簡單, 就係用手撕開 injera然後點wat食.

埃國短暫受意大利統治, 所以Pizza 及意粉是主要當地主要食糧

. 

住宿

普遍城市既住宿都係好簡陋, 不過未致於太差, 比起西藏還好一點.

房間通常都係好簡約, 一張床, 一張被, 一張毛毯, 一個蚊障, 一支吊燈, 係咁多. 大部份旅店都有獨立浴室既房間, 比share浴室既貴少少. 不過供水時間不穩定, 而且水壓唔夠, 花灑只有一條線既水流出來. 部份缺電既城市更未必常有熱水供應, 所以要有心理準備就算有浴室冇涼沖.

全國有三間位於首都的4/5星級酒店, 最靚既係 Shareton, 盛惠二千幾一晚.

<<< 返回埃塞俄比亞 索引