L'Arc-en-ciel Tour Live in Hong Kong --- 正式開始!!

2008年5月24日，雖然8點先開show，但難得二人山長水遠黎到機場，一於"扮"去旅行，而且因為身為路痴既我，揚言要帶路，所以我地6點就黎到機場喇！

一路行扮入集出境，一路遊訪下機場.........行到最盡，發現有間pacfic cafe，諗起有杯free coffee未飲，即刻換返杯慢慢歎.........

(free既野係特別好味既~~~)

邊飲邊行，慢慢就行到去機鐵站 (到最後都係未搭過既民少負責帶路......)

(機場快線，只搭了2分鐘都影相.......車內開始見到有日本打扮既女仔)

未去到會場前，民少覺得我地算係後生歌迷，但入到在機場快線車內，已經見到不少後生仔女，再入到會場，發現我地已經係差不多最老個group！雖然其實大家齡都係廿十幾歲，但二十頭到二十中都係有分別架........我都話架喇，民少.......

初初我反而認為，女歌迷一定具多，但原來是好平均地，大約男女各一半！男fans既die hard程度，仲勁過女fans!!

(上圖: 一見到就已經開始心跳加速！)

(進入主會場前，大批fans圍住此張poster影相，雖然佢地已經上左年紀，但我覺得仍然好型仔呀......)

唔知點解，今年有好多當紅既國際歌手都黎亞洲開concert，唔通中國人真係有錢左咁多? 攪到我依年黎大出血！由初初買Christina既$380飛已經覺得肉赤，跟住$480既BSB, 到而家$580既 L'Arc-en-ciel，真係人都癲！(當中其實仲有幾個想聽，不過無錢........) 不過成日本住今次唔睇，就無下次既心態，咁就沈淪落去喇........

不過講返3次既人次，今次真係最盛大！有相為証呀！

(圖上: 最左手邊排隊，唔係為左入場，而係買紀念品呀！完場時仲多人排！)

L'Arc-en-ciel除左受各年輕男女(自認仲年青), 同rock友愛戴外，仲係受好多地方既人歡迎，除左最多既香港人外，日本, 台灣都好多 (明明日本台灣上海都有o係當地開concert既，仲要過到黎HK睇多次，真係die hard！) 最奇係南亞地區都有，泰國呀, 菲律賓呀，連印巴籍人仕都有！依個時候，終於感受到香港係一個幾咁國際既地方！
原來睇返報導，L'Arc-en-ciel黎HK開concert既原因，都係香港可以方便各國既人仕到達咋！有幸生於香港.......無天災之餘仲係國際城市！

不過今次既concert保安異常嚴禁，上圖點解我地要排緊隊入場，就係因為要逐個逐個查袋！輪到民少時，佢竟然唔俾入！原來係因為袋住個相機！(無錯，相機係唔俾入呀！)要人拎左去保管行李處，先再排過隊入場！好彩醒目既民少，一個轉身，就將相機放入褲袋，排過另一條隊入場！如果俾著我俾人折，我真係會排隊寄存行李.......

(等開場中)

Concert開始左後，仍然有大批實招巡邏，一見到有人拎相機出黎，就叫佢擺出去後先可以返入黎睇！真係嚴密到不得了........

7時15分入到場，依個就係我地同台既距離喇！(約大半個足球場)

到8:10分時，已經睇唔到有乜空位剩喇！今次真係可以用座無虛席黎形容呀！

8:20分，正式開場！！！

第一首歌應該係08年新歌: MY HEART DRAWS A DREAM

嘩！第一首歌所有人都已經企晒起身！我地坐下層既觀眾仲企上張櫈到！最後O係第6首歌左右，俾實招命令坐返低........ 場館分上下兩截，絕對唔似紅館咁斜，所以上截既人就算起晒身都唔驚........

第二首係GTO既主題典，名顯依首舊歌係全部人都識，於是俾第一首歌跳得更熱烈！！唱左只係兩首，已經跳到出晒汗！

L'Arc-en-ciel既歌10首有9首半都係快歌，觀眾跟本唔駛WARM UP! 絕無冷場！因為由頭到尾，所有觀眾都係企係度邊唱邊跳既！(係只有我，有一首唔太識既歌時，因為太肚餓跳得太攰，坐左O係度食左半份三文治.......)
Concert中，大家時而舉手奮力打拍子，時而雙手拍掌，時而雙手向左右搖擺.......唱到有英文歌曲時，就全場一齊唱.......真係high到爆！LET'S ROCK & ROLL!!

最驚喜既係，4位成員全部都係用廣東話講野！當然講得最多既係主音hyde，而且發音非常不錯！最記得頭個幾句係 「你地好！係咪等左好耐? 中國地震，但希望大家今晚可以開心D。有無問題？無問題？」

唱到大家都以熟能詳既"Stay Away"時，竟然黎個大兜亂，4位成員(HYDE主音, KEN結他, TETSU係BASS, YUKI係鼓) 掉亂晒身份 ---
hyde去左去彈結他，
Tetsu就去左唱歌，Ken就彈bass，
到Ken去唱時，Tetsu就返去彈bass,
最後，KEN上左去打鼓，一直唔多出聲既YUKI就落左黎唱歌！！仲要俾最難唱個part佢唱！真係玩死佢！亦都俾到好大既新鮮感俾我地！

而且今日既KEN同我睇DVD既好唔同！今場既阿KEN，表演非常活潑！外表cool cool既KEN仔，笑起上黎時好似大細路咁！好可愛呢......做CM時，會一邊對住拼音紙，好辛苦咁讀出廣東話，一邊有相俾我地睇佢食過D咩野，雖然講得麻麻，但見佢辛辛苦苦都要盡力讀出出句台詞，真係有種好尊重當地人既心呢......除左讀歌名外，真係每隻字都係用廣東話，HYDE仲成日叫我地:「跳呀！跳呀」，臨完場仲有一句:「尋日食左皮蛋，以後都不食啦。」

encore休息時，我地全場人，自己同自己玩！除左樓上既人不停用叫踩地台，做出嘈音外，我終於嘗試到玩人浪既滋味，由最近台既第一大橫行開始 (即係唔分上下截)，邊叫邊起身邊舉起雙手，一層接一層，一浪接一浪，去到最後個行時，又會翻返過黎，再去到最前面，完成晒一整個系列後，全場就會鼓掌，真係非常攪笑！就係依D自娛方式，短短既10分鐘，L'Arc-en-ciel已經換晒衫，進入encore狀態！

encore部份，唔知係咪預定部份，HYDE突然落台與觀眾握手，前排觀眾緊係興奮到暈啦，難為D實招哥哥(分分鐘仲後生過HYDE架！)黎護駕！

 最後，HYDE:「.....最後一齊唱。有冇問題？(全場靜晒) 最後嘅一首歌 - あなた(ANATA )」係難得既慢歌.......雖然當時我仲未聽過，但我只係閉著眼，一聽已愛上，有種個心那住那住感覺.......而且大部份人跟住一齊唱......在場人仕無不感動..........

演唱會在兩個鐘後結束，除左10分鐘既換衫時間外，歌曲真係一首接一首......最利害既係，平時聽演唱會，表演者會o係CD上既歌音位轉低個音黎唱，但HYDE不但不會轉低，仲會特登唱高八度.........而且佢地D歌係出名難玩難唱，4位成員既實力亦o係日本數一數二既。

特別係唱最後一首歌あなた時，本來副歌上用假音唱既位，HYDE竟然用實聲照唱上去！真係好癲！愛死你了！

 
10:30PM，演唱會完結，人們開始散去........

(我塊面咁紅，唔係因為查左胭脂，係由跳到T-SHIRT都濕晒.......

(連平時無我咁大汗既民少，都好似O岩O岩打完波咁.........)

歌曲rundown如下: (節錄自失敗論壇既Juidee)
1. get out from the shell
2. driver's high
3. killing me
hyde mc
4. drink it down
5. daybreak's bell
6. winter fall
7. 花葬
8. my dear
9. forbidden lover
10. my hearts draws a dream
11. careless of venus
12. revelation
13. 7th heaven
14. pretty girl
15. stay away
16. ready steady go
17. 敍情詩
18. honey
19. link
20. anata
(仲有樓主既詳盡報導: http://www6.discuss.com.hk/archiver/?tid-7235505.html)

其實以上20首歌入面，我有3-4首係唔太熟既，但當返到屋企聽返，再回億返concert既畫面時，足以仍令我沈醉o係L'Arc-en-ciel既世界中.......民少更加由開concert前一個月至到而家都成日彈住佢地既歌，亦就係下圖既DVD(由買返黎到而家都仲成日睇！)，令到我地點窮都要睇今次既concert

 就係依隻15周年既concert，渡我地升仙.......

PS: 返到去，因為不停打節奏既關係，隻右手臂痛左兩日........(相信在場好多人同我一樣.........)