小 B 發燒

個幾星期前自己又病咗，又係要連續睇幾次醫生都唔斷尾嗰隻，一直係咁咳同流鼻水。

噚日朝起身，見到小 B 都流緊鼻水，可能我又傳染咗感冒俾佢，又或者今個星期天氣轉涼，冷親吓，不過點都好，都俾咗 d 收鼻水藥佢食。而噚晚因為要回娘家做節，細姑媽同嫲嫲又想見小 B，所以下午一早就送咗 Jason 去嫲嫲屋企先，自已再出去攪其他嘢！

夜晚同老婆返到娘家，細姑媽就話 Jason 發燒，摸吓佢，頭同身都幾興；真係似發燒。無探熱針，無藥係手，無嘢好做，祗好快快食完飯趕返屋企先處理。

回家探熱，37.2 度，微燒！ 好在雪櫃一直有發燒藥備用，哪哪淋俾藥佢食，再跟手食埋夜奶，俾佢早 d 瞓！

半夜四點半，特然俾 Jason 喊聲驚醒，見佢扭埋一邊係咁喊，抱起佢，嘩！個身好似火爐咁，再探熱，今次 38.5度，明顯係發燒........... 點呢？？？ 今次係 Jason 出世以來第一次發燒，所以無經驗，有 d 心急同擔心。

Anyway 第一時間叫自己冷靜，同時腦內即時 re-call 所有睇過嘅兒科書藉，諗處理方法！又咁啱臨瞓前剛好睇過一篇周刋講如何處理小兒發燒。照跟！

先除咗多餘嘅睡袋先，等佢散熱，抹汗，先俾d水佢飲，補充水份。 38.5度又未到高燒，可以再俾之前嘅"低燒"退燒藥佢食；(屋企仲有隻退燒藥備用係俾 39 度以上"高燒"嘅) 再睇返份量，原先醫生建議 2 ml，但藥廠就建議 2.5ml。臨瞓前食過 2 ml，無效，所以今次食 2.5 ml ！ 食完，再俾多 d 水 Jason 仔飲，發燒係咁出汗，補充水份好重要。 之后再抱著 Jason 瞓，(其實係佢唔肯俾我放祗) 抱咗成粒鐘，再探，37.2 度，退咗少少燒，同時 Jason 先瞓得著！

今朝起身，再探 36.8 度，正常返！ 搏鬥咗成晚，好攰！