熄火

近排好鬼死悶，無心戀戰，仲慘過 d 女士 M 到！所以無心機寫  blog.。

上星期心血來潮，想買隻靚手錶振奮吓自已士氣，又同 Edmund 哥講開 Rolex 隻新錶 Deep Sea。好！就買佢。周圍打電話問人，問相熟嘅舖頭揾貨...........

友人 A 話，我買得一隻，仲係水貨，六皮嘢，再揾？無啦，你試吓邊間、邊間，佢地可能仲有.........。我答佢 ： 哦！

跟著問"周大轆"。(我之前 d Rolex 都係同佢地買。) 梁生，你揾 deep sea ?? 無問題，不過要等等先有貨.... 至於價錢......你知啦，呢 d hot item 點都貴少少嘅，行價$68,500；出面炒緊八皮以上，我睇睇七皮嘢揾隻俾你得唔得先？？？  我又答佢：哦！

出門口跟著行去 Rolex 專門店問價， $68,500 無現貨，但係接受預留..... 預留？買樓咩？ 個經理話 Waiting list 有弍佰幾人排緊隊......... 再一次我答佢：哦！

跟著又走去友人 A 介紹嗰間二手錶舖八吓，竟然有隻現貨 Deep Sea 待售喎！價錢仲係原價 $68,500....... 嘩！！！發達喇，哪哪臨 check 吓隻錶，有原装膠紙，保証書，對埋機身編號，地區編碼...."888" 唔！香港錶，行貨！ 正。

帶上手........................................................特然；唔知點解個心買嘢嗰團火一吓子無晒。望著隻錶？？？？千百個問號？？？？無乜特別啫？點解要買，做乜要買？買嚟做乜？？望著隻錶幾分鐘，放下，同老板講：唔好意思，要考慮一陣；老板話：仲要諗？轉頭無機會.....  走出門口，頭也不回；直奔地鈇......接老婆去也。

嗰一刻感覺好怪；比較以前，就算八皮，即買！此刻原價買到反而唔想要。離開錶舖一刻；心情愉快，比買咗隻錶仲更加開心；打電話俾老婆....我剛剛慳 咗 $68,500。

嗰邊廂，老婆話：乖喇！