係咪買錯樓?

點解我條村, 咁多自命高貴, 又多管閒事的師奶!!! 又係因為狗的問題, 又遇到呢亭 "屋村管理員", 唔請佢做保安, 真係浪埋沒佢的天份!

我地一向有個習慣, 放完BOBO後, 響屋企樓下的一個乘涼位同BOBO梳毛, 平時D保安叔叔同清潔嬸嬸行過, 都無勸喻我地唔好響度梳毛, 反而仲會寒喧下.

今朝我如常同BOBO梳毛, 坐低幾分鐘後, 有個著長衫長褲+毛毛背心的"扮貴婦"女人, 無端端走埋黎, 用唔純正的廣東話同我講: "你呀, 唔好響度同隻狗梳毛, 搞到D毛四圍飛, 依家禽流感咁犀利, D狗毛有菌架, 四圍飛好唔衛生架!" (下, 狗都屬於 "禽" 咩??)

我忍住, 仲有少少禮貌同佢講: "請問邊度有狗毛四圍飛? 咁請問應該去邊度梳呢?" (其實我咁講都有D多餘....)

"返屋企囉!呢度公眾地方唔梳得架!! 你係成年人應該識呢D事, 業委會講左啦, 你做咩唔去會呀?"

"好, 等我梳埋呢次先啦! 咁你都唔好響度撥頭髮, 你D頭髮一樣會四圍飛, 點知有無菌!"  (佢邊講邊撥自己D頭髮)

"嘩, 你咁唔得, 你相唔相我叫管委會捉你走!"   (用隻手指指住我)

"好!你最好叫管理員同我講, 我完全聽唔明你講乜, 你叫啦, 我等你!"

"你聽唔明?!咁我同你講國語喇喎."

佢連國語都唔正, 帶D鄉音, 仲要講完國語之後問我"UNDERSTAND?!"  哈!!佢真係開正我果範, 我嬲到上惱時, 有個壞習慣, 會用英文鬧人, 平時叫我講反而講唔出.

我一路用英文講, 佢一路緩步跑. 我咪跟住佢囉, 原來佢係怕英文的, 就係咁, 佢就跑走左. 

***********************************************************************

限制響公眾地坊梳毛??......我未聽過, 如果屬實, 唔該管理處出張通告話我知.  如果我真係梳到狗毛四處飛, 我會認, 但事實唔係嘛. 呢條村係容許養狗的, 一落樓就會見到狗, 相信買樓時都會知, 佢咁不滿, 點解要買呢度!

前排睇過一張無厘頭通告, 有人投訴有狗隻響屋企行得太大聲, 影響樓下住戶!!!! 吹脹!! 連行路都有限制?! 有時人的文明同自由唔係咁用, 係應該大家互相尊重, 點解唔可以用溫和的方法去表達呢!

講完, 舒服晒