《紅藍兒女一家瘋》之「校服短裙與加冕制服」（舒展超）

我知。我懶，我忙，我渣，我衰。我又再遲了在這兒交稿，因為我又再遲疑不決地，決定不了要寫甚麼，又遲又疑就過了幾個星期。
不過，今次，個天幫我。
一個平常不過的下午，一位幾年冇見的小學同班同學「秀婷」（葉穎婷），忽然在其Facebook上Post了一句話，我剛巧即時看到，不經意地回應了她一句，只不過是一個字。
卻在大家想也沒想過的情況之下，又引來了「大海參」參與「答嗲」，很快就演變為熱烈討論……
過程中，我深深感受到所謂的「紅藍精神」在那一刻發揮小宇宙，在虛擬世界中凝聚著我們這三位「紅藍兒女」。
同時，我卻又感到，「紅藍精神」，真是有點瘋、有點狂的。那個下午，就是三位狂人忽然在Facebook發瘋！
不過，瘋得來，真是很溫馨；彷彿大家都回到了中學時代。吊詭的是，在中學時代裏，這三個人，肯定從來沒有如此對話過。

以下全部原文照錄（包括錯字）。「婷」是「秀婷」，「銘」是本人（＝余銘），「森」是「大海參」（＝鍾樹森）。另有一位特別嘉賓「姍」，到時大家自然會知道她是誰！

話說，「婷」在Facebook上，如此Post了一段：
「嘩，我可以著得落我個大女件校服，大家有冇興趣睇？？Ha ha……」

以下是該段Post的回應：

銘：冇

婷：點解？？

銘：校服誘惑咩！咪玩啦！

婷：諗落又幾恐怖喎！但我咁大個女都未試過條校裙著落重有鬆吖嘛！！！：）

森：但我見你咁寫，即係你又好想比人睇喎！一係你唔好比人睇，一係你又直情無謂問人就咁整出黎比人睇啦！心大心細咁，似乎想有人支持之後，就有民意基礎咁登出黎呢！

銘：講來講去，兜來兜去，即係想話你瘦了好多？定係想話你大女仲肥過你以前？……話時話，如果你大女都係培正，咁我又有d想睇你著喎，話晒幾十年未見過了……

銘：不如明年博社嘉冕，就邀請妳著番一件培正校服裙出席啦！肯定勁爆全場！肯定成為佳話！好期待呀！

銘：但可能個效果會變成 cos-play……

森：咁就有請報名啦！本年內先付$500有得平呢！
　　等著你，當年的「肥婷」！

婷：余銘，如果佢唔係讀培正，我又點會諗咁多嘢呢……

銘：哇！Sam，你講了「禁斷之稱號」呀！
　　話時話，「秀婷」你做乜無啦啦走去著你大女條校服裙呀？你變態架？

婷：話時話，點解加冕要成二千多大両？你哋唔驚冇人嚟？

銘：「秀婷」，咁你要講清楚，到底你大女讀中學定小學，幾年班……如果你係著到佢小學條裙，就相當之恐怖同不可思議！如果佢係中學，咁我真係寧願睇佢本人著好過睇你著！

森：兩件事
　　噢！禁斷唔禁斷都講左，由得佢啦！
　　二千多元係跟凱社既價錢，加冕活動其實有好多野都係我地要包起比錢，我地希望加冕時d野做得足d，無謂搞到連謝師宴都無埋啦！

銘：阿Sam，「秀婷」的問題，你真係要好好發封信向大家說明一下，那些未參與過開會的同學，真係唔會明白。

婷：Haha，你想死，話我變態，依D叫好奇。我個女讀小五，就嚟同我一樣高，只差2～3吋。

森：點係小學就恐怖先？係邊個人恐怖？定係個處境恐怖？定係邊件事恐怖？
　　又出信，睇黎都要出，但我最近真係要出好多信，不如出版界余銘你幫我起草啦！

森：我覺得有三個人好得閒，留呢段comment快到好似chat room咁……

銘：我此刻被《Breakazine》追緊稿，又未寫「20世紀少年」的稿，我仲一直想在120周年校慶前趕出一本同培正有關的小說，諗住發下校友財……鬼得閒幫你起草！真係起你條草！

婷：我老公咪凱社囉，佢有好多同學覺得貴冇嚟。重有，可唔可以唔做件uniform？啲人著完又唔會keep，wasting of money！！！

森：你唔肯寫都唔洗列一大堆理由，我要列都可以列一串啦！
　　貴唔貴我真係唔識講，有某社減到一千五都有人話貴。
　　我仲苦惱，我老婆唔知到時加冕好定係做家屬好呢！
　　其實我都唔知可唔可以唔做uniform，但聽同學會d人既口氣，似乎無得唔做咁。

銘：成件事都係waste of money啦，冇計……所有呢d校友活動到頭來都變成有錢人的活動，實在令人欷歔。其實我都有少少化，有d想唔玩。

森：余銘，你咪唔玩呀！我「指以」你頂住嫁！

婷：可唔可以著同一樣色的衫 instead of buying uniform？

銘：唉，「旨意」兩個字全部錯晒，咪鬼話人知你係培正呀！

婷：咁，應該係「嘉冕」定係「加冕」？

銘：我覺得經過咁熱烈討論，可見「秀婷」同學愛培正之心實在熱切，嫁了培正老公，生了培正女，又不忘試著培正校服裙，我建議下次博社嘉冕會議，邀請埋「秀婷」同學加入啦！

森：多謝指定，小弟一開始就發現自己想不起「旨意」怎樣寫，所以都用引號啦！

婷：我阿爸阿妹都係培正，但我唔係幾識寫字，幫唔到你喎！！！

銘：三代培正，一家培正！勁呀！
　　培正培正何光榮，教育生涯慘淡營！
　　培後雋兮其素志，正軌道兮樹風聲！
　　萬千氣象方蓬勃，鼓鑄群材備請纓！
　　愛我培正莫謀遠，永為真理之干城！
　　永～為～真理之干城！

森：培後「進」……

婷：我阿爸冇啦加都會係屋企唱培正校歌架！！重有校旗歌都係佢的「飛佛」。

森：愛我培正「謨」……

銘：好明顯有人拿住本《培正詩集》在玩校對啦！
　　你咪使「指以」我再來開會了，你搵「秀婷」代我個位啦！

銘：離晒題了，講番「秀婷」著校服裙啦！

森：我可以好清楚咁講，我無拿住本「詩集」！只係我記得啫！
　　你咪「借d依」就想唔做野，下次開會時會繼續搵你！

姍：多謝學長們，我從來都唔知D歌詞原來咁寫，只係識跟住唱。
　　不如攪個經濟版嘉冕，做福吓後輩，唔係過兩年我個社（曦）又話前幾輩二、三千咪愈攪愈貴，而家經濟唔好乘機攪返平佢「眾樂樂」嘛！
　　家姐條校裙唔好咁短呀，因住羅曉梅叉你呀！

（完稿於2009年9月8日18時8分）