你問我、我問邊個？

最近每次見到一個政府宣傳片，就覺得非常、非常討厭，呢個就係証監會改左 "問我" 首歌果個廣告。我唯一嘅感覺只係官僚卸膊。無非想講 : 〔叫左你投資"做功課"，出左咩事都好，唔好賴我呀！〕。

究竟呢個世界有邊個曉"做功課"呢。D雷曼苦主之前聽大銀行話雷曼得咩AAA評級，研究過銀行俾嘅資料，算唔算做過功課呢？咁點解又搞成咁呢？

D所謂專業分析員，做左幾十年，個個星期都讚匯豐好，叫人買，最近又話匯豐令佢好失望，佢可唔可以叫做識"做功課"呢？

咁匯豐出事又可以之前唔出盈警，又原來新嘅會計制度可以把扁值資產包裝。

你叫D小市民，亞公亞婆，去邊道學"做功課"？

之前有個舊堂友做左投資顧問，07年話個股市係百年來最好，因為無乜杖打。話自己好想幫朋友，好有熱誠，話自己個個星期做分析(其實由始至終都係收過佢一份所謂分析咁大把)。你幫佢買左之後唔夠一年佢老哥就另謀高就，張你份單掉比一個從來都冇念過聯絡你嘅SALES。

咁呢D顧問又識唔識"做功課"呢? 定話公司叫佢賣乜就乜呢？

傻強又識唔識呢？如果佢識嘅話，可唔可以教教廣大市民，如果佢唔識，咁可唔可以話俾大家聽邊個識?