葉伯 vs 曾獻紙

好耐無更新網誌了，本來想繼續寫寫美國見聞，例如：麥當勞的總部及老麥博物館、芝加哥的風貌及紐約的大都會博物館等。

不過，奧運聖火今早(5月2日) 在B Sir所住的屋苑經過，所以不得不寫幾筆。

B Sir家住沙田城門河畔某屋苑，風景怡人。我做人比較天真、單純，只要在城門河跑跑步，我己經覺得好快樂。

但今日，我所住的小區戒嚴呀！

上午出門，屋苑外圍「棟」滿藍帽子警察先生，起碼有50人以上。每一交通燈兩邊各「企」3人，中間安全島又加1位，每2格巴士站又1位，仲有樹下路上；根本就係戒嚴。

然後，屋苑大堂外泊滿旅遊車，一車一車「紅衣長者」，有些天真無邪單純地坐在掛上「洋務公會」「工聯會」名牌的旅遊車上；有些站在屋苑大堂內外高聲言談、大口抽煙及順便避雨，好不享受。

天公竟然學CNN，傷害中國人民的感情，夠膽落雨；真係唔怕憤青們好似杯葛家樂福咁杯葛佢嘅。

路上「紅衣外援」「正義警察」橫行直行；車輛一係塞死，一係改道。我想拿相機拍幾張相片，但又落雨又趕時間又驚差人拉，只有作罷。

我諗，點解平日唔多運動的人忽然咁支持奧運(如果奧運會算係運動會)？點解平日唔多運動又唔多支持運動的「曾獻紙」(甚麼紙？獻給誰？我可不知啊！) 可以當「飛輪火炬手」？但係長跑界的icon葉伯卻題都無人題吓。

如果，在聖火傳到城門河那一刻，一位平常每天都在城門河跑步的人士唔覺意跑步經過，他的結局會點？